Meke 59 - AI VOLA TABU（FIJ1864）

Sa masuta na Kalou ko Tevita me vakabulai koya mai na nona meca, 1, 2. A nodrai valavala na nona meca, 3-7. Era na cudruvi, 8-15. Sa vakavinavinaka kokoya vua na Kalou, 16, 17.Vua na Domo-ni-meke; Ali-tasikici. Ai vola i Tevita, ni sa talaki ko Saula, a ra sa vakatawa na vale me vakamatei koya.

1MO vakabulai au, noqu Kalou, maivei ira na noqu meca: mo vakarurugi au maivei ira era sa tu cake mai kivei au.

2Vakabulai au maivei ira na daucaka cala, ka vakabulai au mai na tamata dauveivakamatei.

3Ni ra sa lawavaka na yaloqu: era sa soqoni vata na qaqa me veivala kei au; ka sega, Jiova, e na vuku ni noqu talaidredre, se na noqui valavala ca.

4Era sa cici ka vakarautaki ira, ka sega e na vuku ni noqu caka cala: mo yadra mo vukei au, ka vakaraica.

5Ia ko iko, Jiova, na Kalou ni lewe vuqa, na Kalou nei Isireli, mo yadra me cudruvi ira kece na veimatanitu: mo kakua ni vosoti ira na caka cala e dautalaidredre. Sela.

6Era daulesu mai kei na yakavi; era osooso me vaka na koli, ka volivolita na koro.

7Raica, era sa dauvosavosa e na gusudra: sa tiko nai seleiwau e na tebenigusudra: ni ra sa kaya tiko, O cei sa rogoca?

8Ia ko iko, Jiova, ko na dredrevaki ira; ko na vakalialiai ira kecega na veimatanitu.

9E na vuku ni nona kaukauwa, kaʼu na qaravi iko kina: ni sa noqui vakaruru na Kalou.

10Ena liutaki au na noqu Kalou dauyalololoma: ena vakaraitaka vei au na Kalou na ka sa na yacovi ira na noqu meca.

11Mo kakua ni vakamatei ira, de na-nuleca ko ira na noqu tamata: mo vakasevi ira e nomu kaukauwa; ka vakamalumalumutaki ira sobu, Turaga na neimami sasabai.

12A ca ni gusudra na vosa ni tebenigusudra, ia me ra vauci ga e na nodra viavialevu; kei na vuku ni ruru kei na lasu era vosataka.

13Mo vakarusai ira e na nomu cudru, vakarusai ira, me ra oti sara: ia me kilai na Kalou ni sa lewai ira na Jekope ka yacova nai yalayala kei vuravura. Sela.

14Me ra qai lesu mai kei na yakavi; ka oso me vaka na koli, ka volivolita na koro.

15Me ra qara kedra voli, ia kevaka era sega ni mamau, me ra ia tiko kei na bogi.

16Ia koi au, kaʼu na meketaka na nomu kaukauwa; io, kaʼu na vakacaucautaka na nomu loloma kei na mataka: ni ko sa noqui vakaruru kei na noqui drodro e na siga kaʼu sa rarawa kina.

17Au na sere vei iko, na noqu kaukauwa: ni sa noqui vakaruru na Kalou, na noqu Kalou dauyalololoma.