Meke 58 - AI VOLA TABU（FIJ1864）

Sa vunauci na nodrai valavala na tamata ca, 1-5. Ena cudruvi ira na Kalou, 6-9; ia era na reki ga na yalododonu, 10, 11.Vua na Domo-ni-meke; Ali-tasikici. Ai vola i Tevita.

1DOU sa vosa dodonu vakaidina li, oi kemudou nai soqosoqo? dou sa lewa vakadodonu li, oi kemudou na luve ni tamata?

2Io, e na lomamudou dou sa caka cala tiko; a ligamudou sa vakarautaka na ka me tawa dodonu e na vanua o qo.

3O ira nai valavala ca era sa lako cala voli mai na kete i tinadra: era sa lako sese, ka vosa lasu tiko, mai na siga era sucu kina.

4A nodra weli gaga sa vaka na weli gaga ni gata: era vaka na gata didivara sa dau-sogota na daligana;

5a ya sa bese ni vakarorogo ki domodra era dauuvu bitu, kevaka sa uvuca vakavuku sara.

6Mo vorota, na Kalou, na batidra e gusudra: i Jiova, mo vorolaka sara na batidra lelevu na laioni kaukauwa.

7Me ra waicala yani me vaka na wai sa dave tiko: ni sa loka na nodra dakai me vanataka na gasau, me tamusuki ga.

8Me ra waicala ka oti yani, me vaka na la dregadregata; me ra vaka na lutudole ni alewa, sa sega ni kunea na mata-ni-siga.

9Ni sa bera ni kila na buka kau vakavotona na nomudou kuro, ena kauti ira tani ko koya me vaka e na covulaca, ni ra sa bula tiko, ni sa cudru ko koya.

10Era na reki na yalododonu ni ra kunea na sausaumi: ena derea na yavana e na kedra dra nai valavala ca.

11Era na qai kaya kina na tamata, E dina era na saumi na yalododonu; e dina ni sa Kalou ko koya ka sa lewa e vuravura.