Meke 56 - AI VOLA TABU（FIJ1864）

Sa tagi vua na Kalou Tevita e na ruku ni nona meca, 1-8. A sa qai vakacegu ni sa nanuma na vosa ni Kalou, ka sa tawa rere, 9-13.Vua na Domo-ni-meke e na Jonace-elemi-reokimi. Ai vola i Tevita, ni ra sa tauri koya na kai Filisitia mai Kaca.

1MO lomani au mai, na Kalou; ni ra sa guti au vakaca na tamata; o koya sai valu mai vei au, sa vakararawataki au e na veisiga.

2Era sa guti au e na veisiga na noqu meca: ni ra sa lewe vuqa erai valu mai vei au, o iko sa Cecere.

3A siga kaʼu sa rere kina, kaʼu na vakararavi kina vei iko.

4E na vuku ni Kalou kaʼu na reki e na nona vosa, au sa vakararavi tiko vua na Kalou; au na sega ni rerevaka na ka era cakava rawa vei au na tamata.

5E na veisiga kecega era kauta vakatani na noqu vosa: a ka kecega era vakananuma na ka meʼu ca kina.

6Era soqoni vata era vunitaki ira, era vakaraica na noqui lakolako, ni ra lawakitaka tiko na yaloqu.

7Me ra dro bula li e na vuku ni nodra caka cala? e na nomu cudru, na Kalou, mo biuti ira sobu na tamata.

80 sa wilika na noqu veiseyaki: mo vakataloca na wai ni mataqu ki na nomu tavaya: sa sega beka ni volai oti e na nomui vola?

9Niʼu sa tagi vei iko, era na qai dro tani na noqu meca: o qo kaʼu kila; ni sa totaki au na Kalou.

10E na vuku ni Kalou kaʼu na reki e na nona vosa: e na vuku i Jiova kaʼu na reki e na nona vosa.

11Au sa vakararavi vua na Kalou: au na sega ni rerevaka na ka era cakava rawa vei au na tamata.

12Sa vauci au na vosa vavakini vei iko, noqu Kalou: meʼu vakavinavinaka vei iko.

13Ni ko sa vakabula oti na yaloqu mai na mate: kei na yavaqu talega, se segai, me kakua ni tarabe, meʼu lako voli kina e na mata ni Kalou e na rarama ni bula?