Meke 55 - AI VOLA TABU（FIJ1864）

Sa tagi vua na Kalou ko Tevita ni sa rere na yalona, 1-8. Sa tukuna ni ra sa nona meca na wekana e so, a ra sa lawakitaki koya, 9-15. Sa vakararavi ki na Kalou ka vakacegu e na vukuna, 16-23.Vua na Domo-ni-meke e na Nikinoca; a Masikili. A Meke i Tevita.

1MO vakatu daligamu, na Kalou, ki na noqu masu; ia mo kakua ni vunitaki iko ki na noqu kerekere.

2Mo nanumi au, ka vakarorogo vei au: au sa vutugu e na noqu rarawa, ka sega ni cegu rawa;

3e na vuku ni domo ni meca, e na vuku ni nodrai valavala vakausausa na caka cala: ni ra sa beitaki au e na ka e tawa dodonu, a ra sa cati au e na nodra cudru.

4Sa rarawa na yaloqu e lomaqu: a sa lutuki au na rerevaka na mate.

5Sa rawai au na rere kei na sautaninini, a sa luvuci au na domobula.

6Kaʼu a qai kaya, Meʼu vakatabana mada me vaka na ruve! niʼu na sa qai vuka yani, ka tiko vakacegu.

7Raica, au na sa qai laʼki tiko sese me vakayawa, ka tiko voli ga e na vanua lekutu. Sela.

8Au na sa qai kusarawa ni dro tani mai na cagi vakacevaruru, kei na cava.

9Mo vakarusai ira, Turaga, ka wasea na yamedra: niʼu sa kunea nai valavala kaukauwa kei na veileti e na koro.

10Era sa lako voli e dela ni kena bai e na siga kei na bogi: sa tiko e loma ni koro na caka cala kei na ka rarawa.

11Sa tiko e lomana nai valavala ca: a sa sega ni yali e na kena rara na veivakaisini kei na dauveivaqaseni.

12Ni sa sega ni meca sa vosa vakacacataki au; ke sa vakaoqo keʼu sa vosota rawa: a sa sega ni dua e cati au sa vakalevulevui koya vei au; ke sa vakaoqo keʼu sa vunitaki au vua:

13ia ka sai iko ga, na tamata edaru a veitokani, na noqu lewe ni sala, edaru a dauveikilaki.

14Ia keirau a dauia na veivosaki vinaka, ka lako vata ki na vale ni Kalou.

15Ena kidaci ira na mate, era na lako bula sobu ki nai bulubulu: ni sa tiko e nodrai tikotiko nai valavala ca, e na lomadra talega.

16Ia koi au, kaʼu na kaci vua na Kalou; ena vakabulai au ko Jiova.

17E na yakavi, kei na sabogibogi, kei na siga levu, kaʼu na masu, ka tagi vakadomoilevu: a sa rogoca na domoqu ko koya.

18Sa vakabula na yaloqu meʼu cegu mai nai valu ka ia vei au: ni ra sa lewe vuqa era ia kei au.

19Ena vakarorogo na Kalou, ka vakararawataki ira, io, ko koya ka tiko mailiu sara. Sela.

E na vuku ni sa sega na veivukiyaki vei ira, era sega kina ni rerevaka na Kalou.

20Sa dodoka na ligana ko koya vei ira era sautu kaya: sa vakacataka ko koya na nona vosa ni yalayala.

21Sa malumalumu na uro ni wai-ni-sucu e gusuna; ia sa tiko e lomana nai valu: sa dada na nona vosa ka kaukauwa na waiwai, ia sai seleiwau sa ucuni.

22Mo biuta vei Jiova na nomu nuiqawaqawa, ena tokoni iko ko koya: ena sega ni laivi ira na yalododonu me ra yavavala e na gauna e dua.

23Ia ko iko, na Kalou, ko na biuti ira sobu ki nai keli ni rusa: o ira na tamata dauveivakamatei ka dauveivakaisini, era na sega ni bula me yacova na veimama ni nodra bula; ia koi au, kaʼu na vakararavi vei iko.