Meke 53 - AI VOLA TABU（FIJ1864）

Erai valavala ca na tamata vakaaduaga.Vua na Domo-ni-meke e na Maalaca; a Masikili. A Meke i Tevita.

1SA kaya e lomana na tamata lialia, Sa sega na Kalou. Era sa vuca, era sa kitaka nai valavala ca e velavela: sa sega e dua sa caka vinaka.

2Sa rai sobu mai lomalagi na Kalou kivei ira na luve ni tamata, me raica se dua sa vuku, se vakasaqara na Kalou.

3Era sa suka tani kecega kimuri: era sa yaco vata me ra velavela; sa sega e dua sa caka vinaka, sa sega sara e dua.

4Sa sega beka na nodra vuku ko ira na daukitaka nai valavala ca? ko ira era sa kania na noqu tamata me vaka ni ra kana madrai: a ra sa sega ni masu vua na Kalou.

5Era a rere vakalevu e na tikina sa sega kina na ka rerevaki; ni sa duibiubiuta ko na Kalou na suidra era sa mai kabai iko: o sa vakamaduataki ira, e na vuku ni sa beci ira na Kalou.

6Me yaco mada mai mai Saioni na bula kivei ira na Isireli! ni na sa saumaka tani ko na Kalou na kedra veivakabobulataki na nona tamata, ena qai reki ko ira na Jekope, ena marau ko ira na Isireli.