Meke 46 - AI VOLA TABU（FIJ1864）

Era sa dauvakararavi rua na Kalou ko ira nai vavakoso lewe ni soro.Vua na Domo-ni-meke. A nodra na luve i Kora. A Meke e na Alamoca.

1A NODAI drodro kei na noda kaukauwa na Kalou, sa voleka sara me vukei keda ni da sa rarawa.

2O koya o qo eda na sega kina ni rere, kevaka sa kauti tani ko vuravura, ka sa kauti ki na loma ni wasa liwa na veiulu-ni-vanua;

3ka sa vadugu na kena wai ka tubu ua, ka yavala na veiulu-ni-vanua ni sa tubu biau. Sela.

4Sa dua na uciwai, na kena soniwai sa vakamarautaka na koro ni Kalou, na tikina tabu ni tikotiko i Koya sa Cecere sara.

5Sa tiko e na kena loma-ni-koro na Kalou; ena sega ni vakayavalati: ena sou na Kalou e na mataka me vukei koya.

6Sa cudru na veivanua, sa yavala na veimatanitu: sa rogo yani na domona, sa waicala ko vuravura.

7Sa tiko vei keda ko Jiova ni lewe vuqa; a nodai drodro na Kalou i Jekope. Sela.

8Dou mai raica na cakacaka i Jiova, ni sa ia na veivakarusai e loma i vuravura.

9Sa vakaotia nai valu mai nai yalayala kei vuravura; sa musuka na dakai ko koya, ka selemusuka na moto, a sa vakama na vale-vodoki e na buka waqa.

10Dou tiko lo, mo dou kila niʼu sa Kalou: kaʼu na vakalevui e na veimatanitu, kaʼu na vakalevui e vuravura.

11Sa tiko vei keda ko Jiova ni lewe vuqa; a nodai drodro na Kalou i Jekope. Sela.