Meke 45 - AI VOLA TABU（FIJ1864）

A meke kei Karisito kei nai vavakoso lewe ni soro.Vua na Domo-ni-meke e na Sosanimi. A nodra na luve i Kora; a Masikili. A Meke ni veivinakati.

1SA tavakerekere na yaloqu e na vosa vinaka; au sa vosataka na noqu cakacaka me nona na Tui: a yamequ na peni ni dauvolavola totolo.

2A nomu lagilagi sa uasivi cake e na nodra na luve ni tamata: sa livi ki na tebenigusumu na loloma: ia na Kalou sa vakalougatataki iko kina ka tawa mudu.

3Mo vauca e na sagamu, na Qaqa, na nomui seleiwau, kei na nomui ukuuku kei na nomu ka vakaturaga.

4Mo vodo lako tiko vakaturaga, mo mani yaco e na vuku ni dina kei na yalomalumalumu, e nai valavala dodonu; ni na vakavulici iko e na ka veivakarerei na ligamu i matau.

5Sa gata na nomu gasau e na lomadra na meca ni Tui; era sa bale e matamu na veimatanitu.

6Ena sega ni mudu na nomui tikotiko vakaturaga, na Kalou: ai titoko ni caka dodonu nai titoko ni nomu matanitu.

7Ni ko sa vinakata nai valavala dodonu, ka cata nai valavala ca; sa lumuti iko kina na Kalou, na nomu Kalou, e na waiwai ni reki sa levu ka lailai na nodra na nomui tokani.

8A nomui sulu kecega sa boi mura, kei na yasi, kei na kasia, mai na vale tabua ni Tui, era vakamarautaki iko kina.

9A gonealewa vakaturaga era kenai tikovaki: sa tu ko ranadi e na ligamu i matau sa vakaisulu e na koula mai Oferi.

10Na luvemu alewa, mo rogoca ka vakanananu, ka vakatu daligamu; mo guilecava na kai nomu, kei na vale nei tamamu;

11ena qai gadreva vakalevu na nomu lagilagi na tui: ni sa nomu Turaga ko koya; ia mo cuva ga vei koya.

12Ia na gonealewa ni Teiri ena mai vakamasuta na matamu e nonai loloma, ia ko ira era sa vutuniyau vei ira na tamata.

13Sa vakaiukuuku na lomana taucoko na luvena alewa ni tui: sa caka ena koula na nonai sulu.

14Ena kauti mai vua na tui e nai sulu culacula: o ira talega na gonealewa na nonai tokani era muria, era na kauti mai vei iko.

15Era na kauti mai e na marau kei na reki: era na curu ki na vale vakaturaga ni tui.

16O ira na luvemu era na tubu mei sosomi kei ira na tamamu, o na lesi ira me ra turaga e vuravura kecega.

17Au na cakava na yacamu me nanumi e nai tabatamata kecega: era na vakavinavinaka kina vei iko na veimatanitu ka tawa mudu.