Meke 44 - AI VOLA TABU（FIJ1864）

A nodra masu na tamata yalododonu, ni ra nanuma na cakacaka ni Kalou eliu kivei ira na nona tamata.Vua na Domo-ni-meke. A nodra na luve i Kora. A Masikili.

1KALOU, keimami a rogoca e na daliga i keimami, a ra sa tukuna vei keimami na neimami qase, na cakacaka ko a cakava e na nodra gauna, e na gauna sa oti makawa.

2Ni ko a vakasevi ira tani e na ligamu na lewe ni veimatanitu, ia ka sa tei ira ga; ni ko sa vakararawataki ira na tamata, ia ka sa vakatuburi ira ga.

3Ni ra a tawa rawata na vanua e na nodrai seleiwau, se vakabulai ira na tabadra: a ligamu i matau duaduaga, kei na tabamu, kei nai serau ni matamu, e na vuku ni ko a lomani ira.

4Sai iko ga na noqu Tui, na Kalou: mo rotaka na nodra veivakabulai na Jekope.

5E na vukumu ga keimami na vakabalei ira sobu na neimami meca: e na vuku ni yacamu keimami na butuki ira sobu era tu cake vakaivalu vei keimami.

6Niʼu na sega ni vakararavi e na noqu dakai, ia na noqui seleiwau ena sega ni vakabulai au.

7Ni ko a vakabulai keimami maivei ira na neimami meca, ia ko ira sa cati keimami ko sa vakamaduataka.

8A Kalou ga keimami doka e na siga taucoko, ka vakamolimoli ki na yacamu ka tawa mudu. Sela.

9Ia ko sa biuti keimami tani, ka vakamaduataki keimami; o sa sega ni lako vata talega kei na neimami mataivalu.

10O sa saumaki keimami me keimami nadaku vei ira na neimami meca: ia ko ira sa cati keimami era sa tokia na neimami ka me nodra.

11O sa soli keimami me keimami vaka na sipi sa lesi me laukana; o sa vakasevi keimami ki na veimatanitu.

12O sa volitaki ira na nomu tamata ka sega na kedrai voli, o sa tawa vakavutuniyautaki iko e na kedrai voli.

13O sa soli keimami me vakarogocataki vei ira sa tiko torovi keimami, me vakalialiai talega ka veiwalitaki vei ira sa tiko voliti keimami:

14o sa soli keimami me dredrevaki e na veimatanitu, me ra kuretaka na uludra vei keimami ko ira na tamata.

15Sa tu vakadua e mataqu na noqu veiseseyaki, a sa ubi au sara na madua ni mataqu,

16e na vuku ni domona sa dauveivakawai ka vosavakacaca; e na vuku i koya na meca sa dauveisausaumi-taka na ca.

17Sa yacovi keimami na ka kecega o qo; ia keimami sa sega ni guilecavi iko kina, se keimami cakacaka vakailasu e na nomu veiyalayalati.

18Sa sega ni saumaki tani na yalo i keimami, se keimami lesu tani e na nomu sala e na neimami lako voli.

19Ia ko sa butudasilataki keimami e na vanua ni gata, o sa ubi keimami talega e na yaloyalo ni mate.

20Kevaka keimami sa guilecava na yaca ni neimami Kalou, se dodoka na liga i keimami vua na kalou tani;

21ena sega beka ni vakasaqara o qori na Kalou? ni sa kila ko koya na ka ni yalo sa vuni tu.

22Io, e na vukumu keimami sa vakamatei kina e na siga kecega ka bogi; keimami sa vakatauvatani kei na sipi ena vakamatei.

23Mo yadra mai, ko sa moce, Turaga, e na vuku ni cava? mo tu cake mai, kakua ni biuti keimami vakadua.

24E na vuku ni cava ko sa vunia kina na matamu, ka guilecava na neimami rarawa kei na neimami vakacacani?

25Ni sa vakacuva sobu ki na kuvu-ni-soso na yalo i keimami: a sa kabita na qele na kete i keimami.

26Mo tu cake me vukei keimami, mo vakabulai keimami e na vuku ni nomu yalololoma.