Meke 25 - AI VOLA TABU（FIJ1864）

A masu gumatua vua na Kalou, sa ia vata kei na vakabauta.A Meke i Tevita.

1KIVEI iko, Jiova, kaʼu sa laveta cake na yaloqu.

2Noqu Kalou, kaʼu sa vakararavi vei iko: kakua ni laivi au meʼu madua, me ra kakua ni marau na noqu meca e na vukuqu.

3Ena sega talega e dua sa namaki iko me madua kina: o ira ga era talaidredre walega era na madua.

4I Jiova, mo vakatakila mai vei au na nomu sala; vakavulici au e na nomui lakolako.

5Tuberi au e na nomu dina, ka vakavulici au: ni sai iko na Kalou na noqui vakabula; kaʼu sa namaki iko e na veisiga kecega.

6Nanuma, Jiova, na nomu yalololoma kei na nomu yalovinaka, ni sa ka mailiu sara na ka o qori.

7Kakua ni nanuma na noqui valavala ca kei na noqu caka cala, niʼu a cauravou: me vaka ga na nomu loloma mo nanumi au, e na vuku ni nomu yalovinaka, i Jiova.

8Sa yalovinaka ka yalododonu ko Jiova: o koya o qo ena vakavulici ira kina na tamata ca e na nona sala.

9Ena tuberi ira na yalomalua e na lewa: io, ena vakavulici ira na yalomalumalumu e na nona sala.

10A sala kecega i Jiova na loloma kei na ka dina kivei ira era sa taura matua na nona veiyalayalati kei na nonai tukutuku.

11E na vuku ni yacamu, Jiova, mo kakua ni cudruvi au e na vuku ni noqui valavala ca; ni sa ka levu.

12O cei na tamata sa rerevaki Jiova? ena vakavulici koya e na sala ena digitaka ko koya.

13Ena tiko vakacegu na yalona; ena rawa talega na vanua na nona kawa.

14A vosa vuni i Jiova sa tu vei ira era rerevaki koya, kei na nona veiyalayalati me vakavulici ira.

15Sa gole tikoga vei Jiova na mataqu; ni na kaliraka na yavaqu ko koya mai na lawa.

16Mo gole mai vei au, ka lomani au; niʼu sa luveniyali ka vakararawataki.

17Sa levu mai na rarawa ni yaloqu: mo kauti au tani mada mai na noqu rarawa.

18Vakaraica mai na noqu rarawa kei na noqu yaluma; ka bokoca na noqui valavala ca kecega.

19Vakananuma na noqu meca; ni ra sa lewe vuqa; a ra sa cati au e na veicati vakaidina.

20Mo maroroya na yaloqu, ka vakabulai au; meʼu kakua kina ni madua; niʼu sa vakararavi vei iko.

21Me maroroi au na yalododonu kei nai valavala dodonu; niʼu sa dinati iko tikoga.

22Mo vakabulai ira na Isireli, Kalou, mai na nodra rarawa kecega.