Meke 26 - AI VOLA TABU（FIJ1864）

A masu ni tamata e vereti ni sa lasutaki, a sa vakararavi ga e na Kalou.A Meke i Tevita.

1I JIOVA, mo lewai au; niʼu a muria lako na noqu yalododonu: au a vakararavi talega vei Jiova; kaʼu na tawa yavala.

2Mo vakadikevi au, Jiova, ka vakatovolei au; vakatovolea na noqui ivi kei na utoqu.

3Ni sa tu ga e mataqu na nomu yalololoma: kaʼu sa muria lako talega na nomu dina.

4Au a sega ni tiko vata kei ira na tamata lasu, kaʼu na sega talega ni nodra lewe ni sala era dauveivakaisini,

5Au sa cata nai vavakoso tamata caka ca; kaʼu na sega ni tiko vata kei ira nai valavala ca.

6Au na vuluvulu na ligaqu meʼu sa tawa cala: kaʼu na vakavolivolita vakakina na nomui cabocabo-ni-soro, i Jiova:

7meʼu vakarogotaka e na domo ni vakavinavinaka, ka tukuna kecega na nomu cakacaka e veivakidacalataki.

8I Jiova, au a vinakata na tikina ni nomu vale, kei na yasana sa tiko kina na nomui ukuuku.

9Kakua ni soqona vata na yaloqu kei ira na tamata ca, se na noqu bula kei ira na tamata dauveivakamatei:

10sa tiko e na ligadra na ca, a sa sinai na ligadra i matau e na tautauri ni vere.

11Ia koi au, kaʼu na muria lako na noqu yalododonu: vakabulai au, ka lomani au mai.

12Sa tu ga na yavaqu e na vanua vinaka: kaʼu na vakavinavinaka vei Jiova e nai vavakoso.