1AU na lomani iko, Jiova, na vu ni noqu kaukauwa.
2A noqu Uluvatu ko Jiova, kei na noqui drodro, kei na noqui vakabula; a noqu Kalou, o koya na noqu kaukauwa, kaʼu na vakararavi vua; a noqui sasabai, kei na ka kaukauwa kaʼu sa vakabulai kina, kei na noqu tikina cecere.
3Au na kaci vei Jiova, o koya sa dodonu me vakarokorokotaki; kaʼu na vakabulai kina maivei ira na noqu meca.
4Sa viviraki au nai vau ni mate, a ra sa vakarerei au ko ira na ca e vaka na waluvu.
5Sa voliti au nai vau ni bulubulu: sa taumadaki au nai cori ni mate.
6E na noqu rarawa kaʼu sa kaci vei Jiova, ka tagi vua na noqu Kalou: sa rogoca na domoqu ko koya mai na nona vale tabu, a sa yaco ki na matana na noqu tagi, io, ki na daligana.
7Sa qai yavala ka tavuki na vanua; sa sautaninini ka yavavala na yavu ni veiulu-ni-vanua, e na vuku ni sa cudru ko koya.
8Sa lako cake na kubou mai na ucuna, kei na buka waqa katakata mai na gusuna: sa vakacaudrevi kina na qilaiso ni buka.
9Sa vakalolovirataka talega na lomalagi ko koya, ka lako sobu mai; sa butobuto e na ruku ni yavana.
10A sa vodoka na Jerupi, a sa vuka: io, sa vuka mai e na taba ni cagi.
11Sa cakava na butobuto me nona yasana vuni e voliti koya, me nonai vakaruru; io na wai butobuto kei na o loaloa ni lomalagi.
12Sa seavu na bewabewa loaloa e nai serau ni matana; —na uca-cevata kei na qilaiso katavera!
13Sa kurukuru talega ko Jiova mai na lomalagi, a sa tabalaka cake na domona ko Koya sa Cecere sara; —na uca-cevata kei na qilaiso katavera!
14A sa tala na nona gasau ko koya, ka vakaseba-yaki ira; a sa vanataka na livaliva, ka vakubutaki ira.
15A sa qai rairai mai na dreke ni wai, a sa votu mai na yavu kei vuravura e na vuku ni ko sa vunauca, Jiova, e na vuku ni sa liwa na cagi ni nomu cudru.
16Sa talaki maicake ko koya, sa tauri au, sa vueti au cake mai na wai e vuqa.
17Sa vakabulai au mai na noqu meca kaukauwa, maivei ira talega era sa cati au: ni ra sa gumatua vei au.
18Era sa taumadataki au e na siga ni noqu rarawa, ia ka sa tokoni au ko Jiova.
19Sa kauti au yani talega ko koya ki na yasana rabailevu; sa vakabulai au ko koya, e na vuku ni sa vinakati au.
20Ena sauma vei au ko Jiova na noqu yalododonu; me vaka na kena savasava na ligaqu ena sauma vei au ko koya.
21Niʼu a vakabauta na sala i Jiova, ka sega ni lesu tani vakaca vua na noqu Kalou.
22N i sa tu e mataqu na nona lewa kecega: kei na nona vunau kaʼu sa sega ni biuta tani vei au;
23kaʼu a yalododonu talega e matana, kaʼu a maroroi au mai na noqui valavala ca;
24o koya o qo sa sauma kina vei au ko Jiova na noqui valavala dodonu; me vaka na kena savasava na ligaqu e matana.
25O na vakatakila na nomu loloma vua sa dauloloma; o na vakatakila na nomu yalododonu vua sa yalododonu;
26o na vakatakila na nomu yalosavasava vua sa yalosavasava; o na vala kaya sa yaloveve.
27Ni ko na vakabulai ira na tamata sa vakararawataki; ia ko na vakabalei ira sa mata viavialevu.
28Ni ko na vaqa-waca na noqu cina; ena vakararamataka na noqu butobuto ko Jiova na noqu Kalou.
29Ni sai iko kaʼu sa cici bula kina e na maliwa ni Mataivalu, ia sai koya na noqu Kalou kaʼu sa ladeva kina na bai.
30Ia na Kalou, sa dodonu na nonai valavala: sa vakatovolei na vosa i Jiova; ai sasabai ko koya vei ira kecega era sa vakararavi vua.
31Ni sai cei me Kalou, ko Jiova duaduaga? ia ko cei tale sa kaukauwa, na noda Kalou duaduaga?
32A Kalou ga sa vauca na toloqu e na kaukauwa, a sa vakadodonutaka na noqui lakolako.
33Sa cakava na yavaqu me tautauvata kei na nodra na koti kila, a sa vakaturi au e na noqu vanua cecere.
34Sa vakavulica na ligaqu me ia nai valu, a sa musuki kina e na ligaqu na dakai kaukamea.
35O sa solia talega vei au nai sasabai ko sa vakabulai au kina; a sa vakataudeitaki au na ligamu i matau, a sa vakalevutaki au na nomu yalomalua.
36O sa vakagagataka na noqu sala vei au: a sa sega ni tidara kina na yavaqu.
37Au a vakasavi ira na noqu meca, ka vauci ira: au sa sega ni lesu tale mai, era sa kawaboko mada eliu.
38Au sa vuetaki ira, a ra sa sega ni wavutu rawa: era sa bale sobu e na ruku ni yavaqu.
39Ni ko sa vauca na toloqu e na kaukauwa me ia nai valu: o sa vakamalumalumutaki ira vei au era sa tu cake vakaivalu vei au.
40O sa solia talega vei au na domodra na noqu meca; meʼu vakarusai ira era sa cati au.
41Era sa tagi yani, a sa sega e dua nai vakabula: to, vei Jiova, a sa sega ni vosa vei ira.
42Kaʼu sa qai vurumemeataki ira me ra vaka na kuvu-ni-soso e na mata ni cagi: kaʼu a biuti ira tani me vaka na lolobo e nai saqata.
43O sa vakabulai au mai na nodra veileti na tamata; o sa cakavi au meʼu liu vei ira na veimatanitu: a tamata kaʼu a tawa kilai ira era na qaravi au.
44Ni ra sa qai rogoci au, era na talairawarawa vei au: era na vakamalumalumutaki ira vei au ko ira na kai tani.
45Era na malai yani ko ira na vulagi, era na rere mai na nodra tikina kaukauwa.
46Sa bula ko Jiova; ia me vakarokorokotaki ko koya na noqu Uluvatu: me vakalevulevui na Kalou sa vakabulai au.
47O koya ga na Kalou sa cudruvaki au, a sa vakamalumalumutaki ira na tamata vei au.
48Sa vakabulai au ko koya maivei ira na noqu meca: io, ko sa laveti au meʼu uasivi cake vei ira era sa tu cake vakaivalu vei au: o sa vakabulai au mai na tamata lomaqa.
49O koya o qo kaʼu na vakamolimoli kina vei iko, Jiova, e na kedra maliwa na lewe ni veivanua, kaʼu na meketaka na yacamu.
50O koya sa ia me ka levu sara na nona vakabulai koya na nona tui; a sa kitaka na loloma vua sa lumuta ko koya, vei Tevita kei na nona kawa ka tawa mudu.
Who We AreWhat We EelieveWhat We Do
2025 by iamachristian.org,Inc All rights reserved.
