1SA tukuna nai ukuuku ni Kalou ko lomalagi; a sa vakatakila na cakacaka ni ligana na cagi-maliwa.
2Sa dautukuna na vosa na veisiga sa veitaravi, a sa vakaraitaka na vuku na veibogi sa veitaravi.
3Sa sega nai tukutuku, sa sega na vosa, sa sega ni rogo na domodra.
4A sa lako yani ga ki vuravura kecega na nodrai vakarau, kei na nodra vosa ki nai yalayala kei vuravura. Sa viritaka ko koya me tu maikina na nona vale na mata-ni-siga,
5o koya o qo sa vakana tagane sa qai vakawati sa lako mai na nonai vakaruru vakaiukuuku, a sa marau me vaka na qaqa ni sa laʼki cici cere.
6Sa vakatekivu na nonai cadracadra e na vu ni lagi, kei na nonai lakolako sa yacova na kenai yalayala: a sa sega na ka sa vuni mai na kena katakata.
7Sa vinaka sara na vunau i Jiova, a sa saumaka na yalo: sa dina nai tukutuku i Jiova, a sa vakavukui ira na tawa vuku.
8Sa dodonu nai lesilesi i Jiova, a sa vakamarautaka na yalo: sa savasava nai vakaro i Jiova, a sa vakararamataka na matada:
9sa savasava na rerevaki Jiova, a sa tu dei ka tawa mudu: sa dina na lelewa i Jiova, a sa dodonu kecega.
10A ka o qo sa daugadrevi vakalevu cake e na koula, io, na koula dina e levu: sa uasivi cake e na oni na kena kamikamica, io, e na qa ni oni.
11Sa vakasalataki talega na nomu tamata e na ka o qo: a sa levu na kenai sau ni sa vakabauti.
12O cei sa kila rawa na nona caka cala? mo vakasavasavataki au mai nai valavala ca sa vuni tu.
13Tarova talega na nomu tamata mai na be; me kakua ni gumatua vei au: kaʼu na qai dodonu sara, kaʼu na sega talega ni cala e nai valavala ca levu.
14Me vinaka e matamu na vosa ni gusuqu, kei na vakanananu ni yaloqu, i Jiova, na noqu uluvatu, kei na noqui vakabula.
Who We AreWhat We EelieveWhat We Do
2025 by iamachristian.org,Inc All rights reserved.
