Ai Vola Kei Jope 38 - AI VOLA TABU（FIJ1864）

Sa qai vosa na Kalou vei Jope, ka tukuna na nona cakacaka, me kila kina ko Jope na nona lialia kei na nona malumalumu.

1SA qai vosa mai vei Jope ko Jiova mai na covulaca, ka kaya,

2O cei o qo sa vakabutobutotaka na lewa e na vosa sa sega ni vuku?

3Mo vauca mada vakatagane na tolomu: niʼu na vakatataro vei iko, ia mo vakatakila mai vei au.

4O a tiko maivei ni kaʼu a tauyavutaki vuravura? mo tukuna mai, kevaka ko sa kila.

5O cei ka virino na kenai vakarau, ni ko sa kila? se ko cei ka dreta kina na dali i vakarau?

6Sa tauyavutaki e na dela ni cava? se ko cei ka vakotora na kena vatu i tutu;

7ni ra a meke vata na kalokalo i volasiga, ka ra kaila e na reki na luve ni Kalou kecega?

8Se ko cei ka sogolatia na wasawasa e nai sogo, ni sa loka, me vaka ni sa curu mai na kete?

9Niʼu a cakava na o me kenai sulu, kei na butobuto vavaku me kenai vau,

10niʼu a vakarauta na kenai yalayala, ka cakava na kenai vakadei kei na kenai sogo,

11ka kaya, Mo yaco mai kike, kakua ni sivia: ia me yala eke na nomu ua viavialevu?

12O sa vakarota beka na sabogibogi e na nomu gauna, ka vakatakila ki na mataka na vanua me kida kina?

13me taura nai yalayala kei vuravura, me ra kuretaki tani kina nai valavala ca?

14Sa vuki o qori me tautauvata kei na dreta ki na ka sa tabaki kina; a sa tu mai na ka ko ya me vaka nai sulu.

15A sa kureitaki vei ira nai valavala ca na kedra rarama, ia ena ramusu na liga viavialevu.

16O sa curuma beka nai vurevure ni waitui? se ko sa lako voli e na dreke ni wasawasa;

17se sa dola oti vei iko na katuba kei mate? se ko sa kunea na kenai sogo na yaloyalo ni mate?

18se ko kila beka na kena raraba ni vuravura? tukuna kevaka ko kila na ka kecega o qori.

19Sa evei na sala sa tiko kina na rarama? ia na butobuto, sa evei na kena vanua,

20mo kauta kina ki na kenai yalayala, mo kila talega kina na sala ki na kena vale?

21O sa kila beka e na vuku ni ko a qai sucu? se na vuku ni sa vuqa nai wiliwili ni nomu siga?

22O sa curuma beka na lololo ni uca-vulavula? se ko sa raica na lololo ni uca-cevata,

23a ya kaʼu sa maroroya ki na gauna ni rarawa, ki na siga ni tuvai valu kei nai valu?

24A sala cava sa wasewase kina na livaliva, sa veibiuyaki kina na cagi mai cake e vuravura?

25O cei sa wasea na sala ni wai me tau mai kina ni sa vuabale, se na sala me se kina na kurukuru;

26me tau kina na uca ki na vanua sa sega kina na tamata; kei na lekutu, sa sega kina na tamata;

27ka me vakaceguya na vanua sa lala ka tawa teivaki; me cakava talega na mata ni co malumalumu me rovu mai?

28Sa vakatamani beka na uca? se ko cei beka sa vakasikava na mata ni tegu?

29a kete i cei sa lako maikina na wai-cevata? a tegu cevata talega ni lomalagi, ko cei sa vakasucuma?

30Sa tabogo na wai me vaka e na vatu, a sa vauci na dela ni wai titobu.

31O na vauca beka na lewa vinaka kei Peliatisi, se sereka nai vau kei Oreoni?

32O na kauti Maseroci beka mai e na kena gauna? se tuberi Arikituro yani kei ira na luvena?

33O sa kila beka nai valavala ni kena lewai na lomalagi? o sa vakayacora rawa mai na kena lewa ki vuravura?

34O sa tabalaka rawa beka na domomu ki na o, me tauci iko na wai levu?

35O na tala beka yani na livaliva, me lako, me mai kaya vei iko, Oi keitou o qo?

36O cei sa viritu na vuku ki na lomada? se ko cei sa solia na yalomatua ki na tamata?

37O cei sa wilika rawa na o kei lomalagi e nona vuku? se ko cei me livia rawa na wai mai na tavaya kei lomalagi,

38ni sa kaukauwa mai na kuvu-ni-soso, ka veikabi sara na qele qa?

39O na vakasava beka na kena kakana na laioni? se vakamamautaki ira na luve ni laioni ni sa viakana,

40ni ra, sa koto sobu e nodrai kotokoto, ka tiko ga e na tikina vuni ni ra lawaki koto?

41O cei sa vakarautaka na kena na reveni? ni sa tagi na luvena vua na Kalou, era sa lako sese voli ni sa sega na kedra.