Ai Vola Kei Jope 37 - AI VOLA TABU（FIJ1864）

Sa tukuna tiko ko Iliu na nona cakacaka rerevaki na Kalou, kei na kena dodonu na rerevaki koya.

1E NA vuku ni ka o qo talega sa sautaninini na utoqu, a sa lade tani e na kena tikina.

2Dou rogoca sara na domona ni sa se mai, kei na kurukuru sa kudru mai na gusuna.

3Sa vakadodonutaka yani ko koya ki na ruku i lomalagi kecega, kei na nona livaliva ki nai yalayala kei vuravura.

4Sa qai vadugu mai emuri na domona, sa kurukuru ko koya e na domona vakaturaga: ia ni sa rogo tu na domona, ena tawa tarova ko koya.

5Sa ia vakurabui na kurukuru na Kalou e na domona; sa cakava na ka levu eda sa sega ni kila rawa.

6Ni sa kaya ki na uca-vulavula, Mo tau ki vuravura: ki na uca wale talega, kei na uca levu ni nona kaukauwa.

7Sa sogodregata na ligadra na tamata kecega; me ra kila na nona cakacaka na tamata kecega.

8Era sa qai laʼki curu ki na nodra qara na manumanu, ka tiko wale e na nodra tikina.

9Sa lako mai na covulaca mai na ceva: kei na liliwa mai na tokalau.

10Sa cevata na wai e na cegu ni Kalou: a sa rabailailai mai na wai.

11A sa vakaoca na o loaloa ni sa vakatauca na kena uca: sa vakaseva na o lumilumisa:

12a sa veikauyaki e na nona vosa: me kitaka kina na ka kecega sa vunautaka ko koya, e na dela ni veivanua e vuravura.

13Sa vakayacora mai ko koya, se me nona kuita, se na vuku ni nona vanua, se me ka ni loloma.

14Mo vakatu daliga, Jope, ki na ka o qo: mo tu vakadua, ka vakanananu ki na cakacaka veivakidacalataki ni Kalou.

15O sa kila beka na siga sa lesia kina na ka o qori na Kalou, ka lewa talega kina na livaliva ni nona o me tibi mai?

16O sa kila beka se sa lili vakavinaka evei na o, na cakacaka veivakidacalataki i koya sa ue sara na nona vuku?

17Se sa katakata vakavinaka evei na nomui sulu, ni sa vakacegui vuravura ko koya ni sa mudre mai na ceva?

18Drau sa tevuka vata kaya beka yani na lomalagi, e sa kaukauwa, ka vaka nai iloilo sa waicalataki?

19Mo vakatakila vei keitou na vosa me keitou kaya vua: ni keitou sa sega ni vakadodonutaka rawa e na vuku ni butobuto.

20Me na tukuni beka vua niʼu sa vosa? kevaka sa vosa na tamata, ena qai tilomi dina ga.

21Ia o qo, sa dredre ni raici na rarama lumilumisa mai lomalagi, ni sa liwa yani na cagi, ka vakasavasavataka.

22Sa vaka na koula sa lako mai na mata ni tokalau: sa tu vua na Kalou nai ukuuku rerevaki.

23O Koya sa Kaukauwa, eda sa sega ni kilai koya rawa: sa levu ko koya ni kaukauwa, ka caka dodonu, ka vutu ni valavala dodonu: ena sega ni ia na veivakasaurarataki.

24O koya o qo era sa rerevaki koya kina na tamata: sa sega ni vinakati ira loa era lomavuku.