Ai Vola Kei Jope 36 - AI VOLA TABU（FIJ1864）

Sa vosa tiko ko Iliu, a sa tukuna nai valavala ni lewa ni Kalou, 1-12. Sa vunauci Jope, a sa vakavulici koya talega, 13-21. Sa tukuna na lewa kei na kaukauwa ni Kalou, 22-33.

1A SA ia tiko ko Iliu, ka kaya,

2Mo vosoti au vakalailai mada, meʼu vakatakila vei iko, ni sa vo tiko na vosa e na vuku ni Kalou.

3Au na kauta vakayawa mai na noqu vuku, ia kaʼu na vakadonui Koya ka Buli au.

4Ni na sega dina ni lasu na noqu vosa: o koya e daru sa tiko kei iko, sa ka dinadina na nona vuku.

5Raica, sa kaukauwa na Kalou, a sa sega ni beca e dua: sa levu na nona kaukauwa kei na nona vuku.

6Sa sega ni maroroi ira tiko nai valavala ca: a sa ia na ka dodonu vei ira na dravudravua.

7Sa sega ni rai tani vei ira na yalododonu: era tiko ga kei ira na tui e nai tikotiko vakaturaga: io, sa vakataudeitaki ira tiko ka tawa mudu, a ra sa vakalevulevui.

8Ia ke sa vauci e nai vesu, ka tauri e nai vau ni rarawa:

9ke sa qai vakatakila vei ira na nodra cakacaka, kei na nodrai valavala ca sa levu.

10Sa basuka na daligadra talega me ra vakatavulici, a sa vakarota vei ira me ra saumaki mai na ca.

11Kevaka era vakarorogo, ka qaravi koya, era na vakaotia na nodra siga ni ra tiko vinaka, kei na nodra yabaki ni ra sautu tiko.

12Ia kevaka era sa tawa vakarorogo, era na mate e nai seleiwau, ka mate ni ra lialia tiko.

13Ta ko ira na yalodauveivakaisini era sa binia na cudru: era sa sega ni tagi vua ni sa vauci ira.

14Era sa mate drokadroka ga, a ra sa tiko vata kei ira na tawa savasava.

15Sa vakabula ko koya na dravudravua e nona rarawa, a sa basuka na daligadra ni ra vakasaurarataki.

16A sa via kauti iko talega mai na vanua osooso ki na vanua lalaga, sa sega ni osooso; me uro talega na ka sa viritu ki na nomui kanakana.

17Ia ko sa vakayacora na nodra lewa nai valavala ca: ena tauri iko na lewa kei nai sau dodonu.

18Ni sa cudru, mo qarauni iko de yaviti iko tani yani ko koya: ena qai tawa vakabulai iko rawa e dua nai soro levu.

19Ena vinakata beka na nomui yau? e segai, se na koula, se na vu ni nomu kaukauwa kecega.

20Mo kakua ni domona na bogi, e dauyali kina na tamata mai na nodra yasana.

21Mo qarauni iko, mo kakua ni goleva na ka tawa dodonu: ni ko a digitaka o qo, ka cata na rarawa.

22Raica, sa vueti keda cake na Kalou e nona kaukauwa; o cei e vakatavuvuli me vakataki koya?

23O cei sa lesia na nonai lakolako? se ko cei me kaya, Ko sa caka cala?

24Mo nanuma me vakalevulevuya na nona cakacaka, a ya era sa dauraica na tamata.

25Sa ra raica rawa na tamata kecega; e rawarawa me raica vakayawa na tamata.

26Raica, sa levu na Kalou, ia eda sa sega ni kilai koya, sa sega ni kune rawa nai wiliwili ni nona yabaki.

27Ni sa vakamimiritaka na wai ko koya: sa tau maikina na uca me vaka na kena bewabewa:

28a ya sa tau mai na o ka mirika na tamata e vuqa.

29Sa dua beka me kila rawa nai tevutevu ni o, se na domo ni nona vale malo?

30Raica, sa tevuka ko koya na nona rarama e delana, a sa ubia na dreke ni wasawasa.

31Ni sa lewai ira na veivanua e na ka o qori; sa solia vakalevu na kakana.

32Sa tabonaka na livaliva e na qeteqete ni ligana: a sa lewa na vanua me se kina.

33A kenai rorogo sa tukutuku e na vuku ni uca, kei na karavau e na vuku ni bewabewa.