Ai Vola Kei Jope 35 - AI VOLA TABU（FIJ1864）

Sa vaka ko Iliu ni sa sega ni ca rawa se vinaka rawa na Kalou e na vuku ni cakacaka ni tamata, 1-8. A sa sega ni kune ka vinaka na tamata e so ni ra sega ni kerea e na vakabauta, 9-16.

1SA ia tiko na vosa ko Iliu, ka kaya,

2O sa nanuma beka me ka dodonu o qo, na nomu kaya, Au sa yalododonu vua na Kalou?

3Ni ko sa kaya, A cava na kena yaga vei iko? A cava na betena vei au, kevaka kaʼu sa vakasavasavataki mai na noqui valavala ca?

4Au na tukuna vei iko, ia vei kemudou vata kei na nomui tokani.

5Mo raica mada na lomalagi, ka sarava: ka vakaraica na o sa cecere vei iko.

6Kevaka ko sai valavala ca, a cava ko sa cakava vua? ia kevaka sa vakalevutaki na nomu talaidredre, a cava ko sa kitaka vua?

7Kevaka ko sa caka dodonu, a cava ko sa solia vua: se cava sa taura maivei iko ko koya?

8Ena ca beka e na nomui valavala ca na tamata vakai iko; ka yaga beka na nomu caka dodonu vua na luve ni tamata.

9E na vuku ni sa levu na veivakasaurarataki, era sa tagi kina ko ira era sa vakasaurarataki: era sa qoqolou e na vuku ni ligadra na kaukauwa.

10Ia ka sa sega e dua sa kaya, Sa evei na Kalou ka buli au, o koya sa solia na meke e na bogi,

11o koya sa vakavulici keda vakalevu, ka vakalailai ki na manumanu ni vanua; a sa cakavi keda me da vuku cake e na manumanu ni lomalagi?

12Era tagi maikea e navuku ni nodra viavialevu na tamata ca, ka sega e dua sa vosa mai.

13E dina ena sega ni vakarogoca na masu wale na Kalou, ena sega ni goleva ko Koya sa Kaukauwa.

14Ia ni ko sa kaya ni ko na sega ni kunei koya rawa, sa tiko ga vua na lewa dodonu: o koya o qo mo vakararavi kina vua.

15Ia o qo, e na vuku ni sa sega ni lako mai ko koya e nona cudru, a sa sega ni nanuma vakalevu na ka ca:

16sa dalaga wale kina na gusuna ko Jope, sa vakalevutaka na vosa ka sega ni vuku.