Ai Vola Kei Jope 39 - AI VOLA TABU（FIJ1864）

Sa tarogi Jope na Kalou e na vuku ni koti kei na teira, 1-4; kei na asa kila, 5-8; kei na yunikoni, 9-12; kei na belo, 13-18; kei na ose, 19-25; kei na taiseni, 26; kei na ikeli, 27-30.

1O SA kila beka na tabayabaki sa vakasucu kina na koti kila ni vatu? se ko vakasama na kena vakasucu na teira?

2se ko wilika na vula era yacova? se ko kila na tabayabaki era vakasucu kina?

3Era koto e ra, era vakasucuma na luvedra, era biuta kituba na nodra yaluma.

4Sa matavinaka na luvedra; era tubu cake mai veikau; era lako tani, ka sega ni lesu tale vei ira.

5O cei sa vakatala lalaga na asa kila? se ko cei sa sereka nai vesu ni asa kila?

6A lekutu kaʼu sa cakava me nona vale, kei na talasiga me nonai tikotiko.

7Sa vakalialiai ira na lewe vuqa ni koro, a sa sega ni rogoca na kaila i koya sa vakasava.

8A nona vanua me kana voli kina na veiulu-ni-vanua, a sa qara na ka drokadroka kecega.

9Ena via qaravi iko beka na yunikoni; se na via tiko e na nomu lomanibai?

10O sa vauca beka rawa na yunikoni e na kena dali ki nai siviyara? se na muri iko ni yarai kadrukadru e na buca?

11O na vakararavi vua e na vuku ni sa levu na nona kaukauwa? se ko na laiva beka vua na nomu cakacaka?

12O na vakadinati koya me kauta mai na nomu sila, ka kumuna mai ki na nomu lololo?

13A tabana na manumanu dau marau ka sa reki tu! sa tabana kei lawena beka na belo?

14sa laiva no na kena yaloka e na qele, ka vakalakalataka e na kuvu-ni-soso,

15a sa tawa nanuma ni na cataka beka na yava, se buturaka na manumanu kila.

16Sa kaukauwa na lomana vei ira na luvena, me vaka era sega ni nona; sa oca wale ko koya, ka sa tawa rere;

17e na vuku ni sa tawa solia vua na vuku na Kalou, a sa tawa vota vua na yalomatua.

18Ni na sa qai tu vakadodonu cake ko koya, ena sa vakalialia na ose kei koya sa vodoka.

19O sa solia beka vua na ose na kaukauwa? o sa vakaisulutaka na domona e na kurukuru?

20o na cakavi koya beka me rika me vaka na vodre? nai ukuuku ni ucuna na ka rerevaki.

21Sa kelia na buca, ka rereki e nona kaukauwa: sa laʼki tavaki ira na tamata era vakaiyaragi.

22Sa dredrevaka na rere, ka sa tawa taqaya; a sa sega ni lesu tani mai nai seleiwau.

23Sa qiriti koya na taga ni gasau, kei na moto makamakalivata kei nai sasabai.

24Sa tiloma na qele e nona lomakatakata kei na cudru: a sa sega ni tu dei ni sa qai uvuci na davui.

25Sa vakaueue ki na domo ni davui; a sa boica nai valu ni sa yawa tu, kei na nodra kurukuru na turaga kei na kaila.

26Sa vuka beka na taiseni e na nomu vuku, ka tevuka na tabana kivakaki na mata ni ceva?

27Sa vuka cake na ikeli, ka cakava maicake na kena su, e na vuku beka ni nomu vosa?

28Sa tiko mai na uluvatu ka sa tu dei kina, e na bati ni uluvatu, kei na tikina kaukauwa.

29Mai na yasana ko ya sa qara na kena; sa irova vakayawa e na matana.

30A luvena talega sa daugunu dra: ia e na vanua era koto kina na moku, sa tiko kina ko koya.