1IA o qo sa vakalialiai au ko ira era gone vei au, ko ira kaʼu a nanuma na tamadra me tawa yaga ni wili vata kei na koli ni noqu qele ni sipi.
2Ia ka cava na kena yaga vei au na kaukauwa ni ligadra, ko ira sa qase malumalumu?
3E na vuku ni viakana kei na dausiga era sa tiko taudua; era dro ki na lekutu loaloa sa lala ka dravuisiga.
4Era tava na co gaga mai veikau, kei na waka ni juniperi me kedra.
5Era vakasevi tani maivei ira na tamata, (era kailataki ira me vaka era daubutako;)
6me tiko e na kikilo rerevaki, e na qara kei vuravura, kei na vatu.
7Era a tagi e loma ni veikau lalai; era soqoni vata e ruku ni kau karokaroa.
8Era luve ni lialia, io, era luve ni kaisi ca: era ca, ka vinaka na qele.
9Ia era sa qai serekali-taki au, io, era sa cavuti au me ka lialia.
10Era vakasisilataki au; era dro vakayawa vei au, a ra sa sega ni rere ni kasivita na mataqu.
11E na vuku ni sa sereka ko koya na nona dali, ka vakararawataki au, era sa laiva talega nai tarovi e mataqu.
12Era sa tu cake na cauravou e na ligaqu i matau; era biliraka na yavaqu, ka caramaka na nodra sala dauveivakarusai meʼu ca.
13Era vakacacana na noqu sala, era vinakata na noqu rarawa, a sa sega e vakavulici ira.
14Era sa yaco mai me vaka ki na bai e basuki: ni sa ia na veivakarusai era sa drigiti au mai.
15Sa lesu mai vei au na ka rerevaki; sa vakasava na yaloqu me vaka na cagi: a sa seavu na noqu tiko vinaka me vaka na o.
16Ia sa qai sova yani na yaloqu e lomaqu; sa tauri au na veisiga rarawa.
17Sa laucoka na suiqu e na yagoqu e na bogi: a sa sega ni vakacegu rawa na noqu ua.
18E na vuku ni kaukauwa ni noqu mate sa duatani mai na noqui sulu: sa vauci au me vaka na bele ni noqui sulu.
19Sa biuti au ko koya ki na oruoru, ia kaʼu sa qai vaka na kuvu-ni-soso kei na dravusa.
20Au sa tagi vei iko, ia ko sa sega ni rogoci au: au sa tu cake, ia ko sa sega ni via kilai au.
21O sa vuki me yalovakatani vei au: o sai valu mai vei au e na ligamu kaukauwa.
22O sa laveti au kicake ki na cagi; o sa vakavodoki au kina; o sa vakawaicalataki au.
23Niʼu sa kila ko na vakalesui au ki na mate, kei na vale sa lesi me nodra kecega era bula tiko.
24Ia ena sega ni dodoka ko koya na ligana ki nai bulubulu, ia ka ra sa tagi ga ni sa ia na veivakarusai.
25Au a tagi, se segai, e na vuku i koya ka rarawa? a sa bibi na yaloqu, se segai, e na vukudra na dravudravua?
26Niʼu a yadrava tiko na ka vinaka, sa qai yaco na ka ca: ia niʼu a waraka na rarama, sa qai yaco na butobuto.
27Sa kere na ketequ, ka sega ni vakacegu: sa taumadataki au na veisiga rarawa.
28Au sa tagi lakoga, ka sa sega ni cilavi au na siga: au sa tu cake, kaʼu sa qoqolou e nai soqosoqo.
29Au sa tacidra na gata, kei na nodrai tokani na lulu.
30Sa loaloa na kuli ni yagoqu, a sa kama na suiqu e na katakata.
31Sa vuki talega na noqu api me ka ni tagiyaso, kei na noqu kove me domodra na dautagi.
Who We AreWhat We EelieveWhat We Do
2025 by iamachristian.org,Inc All rights reserved.
