Ai Vola Kei Jope 28 - AI VOLA TABU（FIJ1864）

Sa tukuna ko Jope na vuku e na ka vakavuravura e so, 1-11. Ia na vuku dina, sa solia ga na Kalou, a sa ka vinaka sara duaduaga, 12-28.

1E dina ni sa dua nai keli ni siliva, kei na yasana sa vakasavasavataki kina na koula.

2Sa kauti mai na qele na aironi, a sa vakawaicalataki na kopa mai na vatu.

3Sa vakaotia na butobuto ko koya, a sa vakasaqaqara na ka kece sara ga: ia na vatu ni butobuto, kei na yaloyalo ni mate.

4A wai sa vure mai vua sa tiko kina; sa guilecavi e na yava: sa mamaca mai, sa lako tani vei ira na tamata.

5Ia na qele, sa tubu maikina na kakana: a sa cukiti mai rukuna na ka e vaka na buka.

6A kena veivatu na yasana ni safairi, a sa tu kina na kuvu ni koula.

7Sa dua na sala sa sega ni kila e dua na manumanu vuka, a sa sega ni kunea na mata ni vulituri:

8sa sega ni butuka na luve ni laioni, a sa sega ni lako voli kina na laioni kata.

9Sa dodoka ko koya na ligana ki na uluvatu; a sa vukica na veiulu-ni-vanua mai vuna.

10Sa basia na dreke ni wai e na maliwa ni veivatu; a sa kunea na ka talei kecega na matana.

11Sa vauca na uciwai ko koya, me kakua ni vuabale; a sa kauta mai ki na rarama na ka sa vuni.

12Ia ka sa kune maivei na vuku? a sa evei na yasana ni yalomatua?

13A tamata, sa sega ni kila na kenai voli; a sa sega ni kune e na vanua ni bula.

14Sa kaya na vanua titobu, Sa sega vei au: a sa kaya na wasawasa, Sa sega vei au.

15Ena sega ni voli rawa e na koula talei; ia na siliva, ena sega ni vakarau me kenai voli.

16Ena sega ni vakatauvatani na kenai voli kei na koula mai Oferi, se na onikisa talei, se na safairi.

17Na koula kei na karisitala sa sega ni tautauvata kaya: ia ena sega ni voli rawa e nai yaya koula dina.

18Ena sega ni cavuti na lase, se na mata-ni-civa ni sai yau talei na vuku, kai yau lailai na rupi.

19A topasa ni Kusi sa sega ni tautauvata kaya; ena sega talega ni vakatauvatani kaya na koula dina.

20Sa na qai lako maivei na vuku? ia sa evei na vanua me kune kina na yalomatua?

21Ni sa vuni ki na matadra kecega era bula tiko, a sa tabonaki vei ira na manumanu kei lomalagi.

22O Rusa kei Mate, erau sa kaya, Keirau sa rogoca na kenai rogo e na daliga i keirau.

23A Kalou ga sa kila na kenai lakolako, a sa kila ko koya na kena yasana.

24Ni sa rai ko koya ki nai yalayala kei vuravura, a sa kunea na veiyasana kecega e ruku i lomalagi;

25me cakava na kenai vakabibi na cagi; a sa vakatovolea na wai e nai vakarau.

26Ni sa lesia nai valavala ni uca ko koya, kei na sala ni livaliva ni kurukuru:

27sa qai kunea na ka o qori ko koya, ka tukuna; sa vakarautaka, ka vakadikeva talega.

28A sa kaya vua na tamata, Raica, na rerevaka na Turaga, o qori na vuku; kei na biuta na ka ca, na yalomatua.