Ai Vola Kei Jope 23 - AI VOLA TABU（FIJ1864）

Sa via lako ko Jope ki na mata ni Kalou ni sa vakararavi vua, 1-9. Sa vaka ni sa kila na Kalou na nonai valavala ni sa dodonu, 10-12. Sa rerevaka tale na lewa ni Kalou, 13-17.

1A SA vosa ko Jope, ka kaya,

2E na siga edaidai o qo sa gaga na noqu tagi: sa ka bibi na ligamu sa tauci au ka mamada na noqu vutugu.

3Meʼu kila mada na vanua meʼu kunei koya kina! meʼu torova sara na nonai tikotiko!

4Kaʼu na qai vakadodonutaka na noqu ka e matana, ka vakasinaita na gusuqu e na vakatusa:

5kaʼu na qai kila na vosa ena tauca mai vei au, ka vakasama na ka ena kaya vei au.

6Ena veilewai kei au ko koya e nona kaukauwa levu? E segai; ena vakaukauwataki au ga.

7Ena veilewai rawa kaya maikea ko koya sa yalododonu: ia kaʼu na qai vakabulai sara mai vua sa lewai au.

8Raica, kaʼu sa lako kiliu, a sa sega kina ko koya; kimuri, kaʼu sa sega ni kunea:

9ki na liga i mawi, na yasana sa cakacaka kina ko koya, ia kaʼu sa sega ni kunea: sa tabonaki koya e na liga i matau, au sa sega ni raici koya rawa kina.

10Ia ka sa kila ko koya na sala kaʼu sa muria: ni sa vakatovolei au oti ko kova, kaʼu na qai lako mai me vaka na koula.

11Sa taura na nonai lakolako na yavaqu; a nona sala kaʼu sa vakabauta, ka sega ni lako tani kina.

12Au sa sega talega ni biuta na vunau ni tebenigusuna; a vosa ni gusuna kaʼu sa vinakata, ka cata na kequ kakana.

13Ia ka sa dua bau ga na lomana, o cei me saumaka tani? a ka sa vinakata na yalona, sa kitaka ga.

14Ni sa ia na ka sa lesia vei au; a sa vuqa na ka vakaoqo sa tiko kaya.

15O koya o qo kaʼu sa kidroa kina e matana: niʼu sa vakasama, kaʼu sa rerevaki koya.

16Ni sa vakamalumalumutaka na yaloqu na Kalou, a sa vakararawataki au ko Koya sa Kaukauwa:

17e na vuku niʼu a sega ni muduki tani ni sa bera ni yaco na butobuto; a sa sega ni tabonaka ko koya na butobuto mai na mataqu.