Ai Vola Kei Jope 22 - AI VOLA TABU（FIJ1864）

Sa tukuna ko Elifasi ni sa ka tawa yaga vua na Kalou na yalododonu ni tamata, 1-4. Sa beitaki Jope e nai valavala ca, 5-11. Sa tukuna nai valavala vakaturaga ni Kalou, 12-20. Sa vunautaka na veivutuni, kei na kena yaga, 21-30.

1SA qai vosa ko Elifasi na kai Temani, ka kaya,

2Me dua beka na tamata me yaga vua na Kalou, me vaka sa yaga vua vakai koya na tamata vuku?

3Sa marautaka na nomu yalododonu ko Koya sa Kaukauwa? se na vakaivau kina ko koya, ni ko sa vakadodonutaka na nomu sala?

4Ena vunauci iko e na vuku ni sa rerevaki iko? ena ia na veilewai kei iko?

5E sega beka ni ka levu na nomu ca? ka tawa wiliki rawa na nomui valavala ca?

6Ni ko sa kauta tani walega na nona ka na wekamu, ka luvata tani na nodrai sulu era luvawale.

7O sa sega ni solia na medra wai ni gunu era sa oca, ko sa bureitaka talega na kakana vei ira era viakana.

8Ia ko koya na ligamatua, sa nei koya ko vuravura, a sa tiko kina ko koya sa daudokai.

9Ia na alewa dawai ko sa vakatalai ira tani, a ra sa lala tu, a sa musuki na ligadra na luveniyali.

10O koya o qo sa voliti iko kina nai cori, a sa vakidroataki iko na rere e veivakidacalataki;

11se na butobuto, mo kakua ni rai rawa; a sa luvuci iko na wai levu.

12Sa sega beka ni tiko na Kalou mai na lomalagi cecere? ia mo raica na kedra cecere na kalokalo, ni sa cecere vakaidina!

13Ia ko sa kaya, Sa kila vakaevei na Kalou? e rawa beka vui me lewa mai na loma ni o?

14sa tabonaki koya na o vavaku, a sa sega ni rai rawa kina; a sa lako voli tu e na dela ni drodrolagi.

15O sa vakabauta beka na sala makawa, era sa daulako kina na tamata ca?

16o ira ka muduki dole na nodra bula, ka ualuvu na ka era tiko dei kina:

17o ira ka kaya vua na Kalou, Mo lako tani vei keitou: se cava beka me na kitaka ko Koya sa Kaukauwa me nodra?

18A sa vakasinaita ga na nodra veivale e na ka vinaka! a sa yawa ga vei au na nodra lewa na tamata ca!

19Era sa kunea ko ira na yalododonu, ka reki kina: a sa dredrevaki ira ko koya sa tawa cala.

20A sa tawa muduki na neitou ka, ia na ka sa vo tu vei ira sa vakamai e na buka.

21Mo drau veikilaki mada kaya, mo drau veivinakati: ena yaco kina vei iko na vinaka.

22Mo vakabauta mada na vunau ni gusuna, ka binia na nona vosa ki lomamu.

23Kevaka ko sa lesu mai vei Koya sa Kaukauwa, o na tara cake; o na vakayawataka nai valavala ca ki na nomu vale.

24O na qai biuta na koula ki na dela ni soso; kei na koula ni Ofiri ki na veivatu ni wai drodro.

25Io, ena qai yaco me nomu bai ni valu ko Koya sa Kaukauwa, me nomu siliva levu talega.

26Ni ko na qai rekitaki Koya sa Kaukauwa, ka ta cake e na matamu vua na Kalou.

27O na kitaka vua na nomu masu, ia ena rogoci iko, o na ia talega na ka ko sa yalataka vua.

28O na lesia na ka, ia ena vakataudeitaki vei iko: ena cilava talega na nomu sala na rarama.

29Ni sa ia na veivakabalei, ko na kaya, Me laveti cake: ia ena Vakabula ko koya na yalomalumalumu.

30O koya sa tawa cala ena vakabulai koya sa cala: ia ena vakabulai e na vuku ni sa savasava na ligamu.