Ai Vola Kei Jope 21 - AI VOLA TABU（FIJ1864）

Sa tukuna ko Jope ni sa sega ni ka wale na nona rarawa, 1-6. Sa sautu e na siga e so ko ira era beca na Kalou, 7-15; ia ka sa daukilai talega na nodra rusa, 16-21. Sa tukuna na lewa ni Kalou ni sa vuqa na kenai valavala, 22-26. Era na lewai emuri nai valavala ca, 27-34.

1A SA vosa ko Jope, ka kaya,

2Dou vakarorogo vakavinaka ki na noqu vosa, ia me sa nomudou veivakacegui na ka ga o qo.

3Dou vosoti au mada meʼu vosa; ia niʼu sa vosa oti, dou qai ia tiko na veivakalialiai.

4Oi au beka, au sa ia na tagi vua na tamata? ia ke sa vakakina me sa tawa rarawa na yaloqu e na vuku ni cava?

5Dou raici au mada, ka kurabui, ka tabonaka na gusumudou.

6Niʼu sa vakananuma tiko kaʼu sa kidroa, a sa tauva na lewequ na sautaninini.

7A cava era sa bula tiko kina nai valavala ca, ka yaco me qase, ka vutuniyau mai?

8Era sa vakataudeitaki vata kei na nodra kawa e matadra, kei na luvedra talega e matadra:

9sa ruru na nodra vale mai na rere, a sa sega ni tauci ira na kuita ni Kalou.

10Sa rika na nodra karavau tagane, a sa yaco ga; sa vakasucu na nodra karavau alewa, a sa sega ni lutudole na luvena.

11Era sa tala yani na nodia lalai me vaka na qele ni sipi, a ra ia na qito na luvedra.

12Era sa taura na lali kei na api, ka rekitaka na domo ni kove.

13Era vakaotia na nodra siga e na marau, ka lako sobu vakasauri ki nai bulubulu.

14O koya o qo era sa kaya kina vua na Kalou, Lako tani vei keitou; ni keitou sa sega ni via kila na nomu sala.

15A cava ko Koya sa Kaukauwa, me keitou qaravi koya? a cava talega na betena vei keitou, kevaka keitou masu vua?

16Raica, era sa sega ni veitaliataka na nodra ka vinaka: me yawa vei au na nodra lewa nai valavala ca!

17Sa bokoci vakavica na nodra cina nai valavala ca! a sa yacovi ira vakavica na veivakarusai! sa vota na rarawa vei ira e nona cudru.

18Era sa vaka na vu-ni-sila e na mata ni cagi, ka vaka na qa-ni-sila sa kauta tani na cava.

19Sa maroroya na Kalou na nonai valavala ca me kedra na luvena: sa sauma vua ko koya, ena kunea talega ko koya.

20Sa na kunea na matana na nona rusa, ia ena gunuva ko koya na cudru i Koya sa Kaukauwa.

21Ni na vinakata vakaevei ko koya na nona mataqali sa muri koya, ni sa muduki laivi na nona bula?

22Sa dua beka me vakavulici koya na Kalou me vuku? ia sa daulewai ira era sa cecere.

23Sa mate e dua ni sa yagokau-kauwa sara, ni sa tiko vakasautu ka vakacegu.

24A sucuna sa to sara e na wai-ni-sucu, a sa suasua na suina e na uto-ni-sui.

25A sa mate e dua ni sa rarawa na yalona, a sa sega ni kana oti e na vakacegu.

26Era na koto vata e na kuvu-ni-qele, ka ubi ira na baca.

27Raica, kaʼu sa kila na ka dou sa nanuma, kei na nomudou vakasama me vereti au vakaca.

28Ni dou sa kaya, Sa evei na nona vale na turaga? sa evei na nodrai tikotiko nai valavala ca?

29Dou a sega beka ni tarogi ira era sa lako voli yani e na sala? dou sa sega beka ni kila na nodrai vakatakilakila,

30ni sa maroroi ki na siga ni rusa na tamata ca? era na kauti yani ki na siga ni cudru.

31O cei me tukuna ki matana na nonai valavala? ia ko cei me sauma vua na ka sa cakava ko koya?

32Ena kauti ga ki nai bulubulu ko koya, a ra na yadrava na nona mara.

33Ia na qele e na buca ena kamikamica vua, ena yarataki ira na tamata kecega me muri koya, me vaka sa ra tawa wili rawa era liutaki koya.

34Ia sa ka wale sara na nomudou vakacegui au, ni sa tiko na lasu e na nomudou vosa.