1SA qai vosa ko Sofari na kai Neema, ka kaya,
2O koya o qo sa kitaki au kina na nanuma ni lomaqu meʼu vosa, kaʼu sa kusarawa e na vuku ni ka o qo.
3Au sa rogoca na vunau meʼu madua kina: a sa ciqeti au na yaloqu matua meʼu tabana yani.
4O sa tawa kila makawa beka na ka o qo, mai na gauna sa vakatikori kina na tamata e vuravura,
5ni sa ka lekaleka na nodra vakaue nai valavala ca, a sa oti rawarawa sara na marau ni dauveivakaisini?
6Kevaka sa vueta na nona totoka ki lomalagi, ka sa yala ki na o na uluna;
7ena yali laivi sara ga me vaka na dena: o ira sa raica era na kaya, Evei ko koya?
8Ena vuka tani yani ko koya me vaka na tadra, ka tawa kune tale: ia ena vakasevi tani me vaka na raivotu e na bogi.
9A mata i koya talega ka kunea ena tawa kunea tale; ena sega ni raici koya tale na nona yasana.
10A luvena era na via vakayalovinakataki ira na kaisi, ena vakasuka talega na ligana na nodrai yau.
11A suina sa sinai tu e nonai valavala ca ni ka cauravou, ena koto sobu kaya e na kuvu-ni-soso.
12Kevaka sa kamikamica nai valavala ca e na gusuna; ka sa vunia e ruku ni yamena;
13ka sa maninitaka, ka sega ni biuta; ka sa maroroya tiko ga e gusuna:
14ke sa dua tani mai na kena kakana e ketena, a sa mi ni gata mai e lomana.
15Sa tiloma oti nai yau, ia ena luaraka tale: ena biuta tani mai na ketena ko na Kalou.
16Ena sucuma na wai gaga ni gata; ena vakamatei koya na yame ni gata loa.
17Ena sega ni raica na soniwai, kei na uciwai, kei nai davedave oni kei na uro ni wai-ni-sucu.
18A ka sa oca kina ena vakasuka tale, ka sega ni tiloma: me vaka na nonai yau ena solia tale ko koya, ena sega ni rekitaka.
19E na vuku ni sa vakasaurarataka ka biuta na dravudravua; a sa kovea na vale sa sega ni tara ko koya;
20ena sega dina ni cegu na ketena; ena sega ni drotaka ko koya na ka sa domona.
21Ena sega e vo me kania na kena; o koya o qo ena sega kina na nonai yau me vo tu.
22Ni sa vutuniyau sara tiko ena dravudravua mai: ena yacovi koya na ligadra kecega nai valavala ca.
23Ni sa laʼki vakamamautaka na ketena, ena vakatauca vua na Kalou na nona cudru katakata, ena vakatauca vua ni sa kana tiko.
24Ena dro tani mai nai yaragi aironi, ia na gasau ni dakai parasa ena laubasikataki koya.
25Sa ucuni mai, sa laubasikataka na yagona; io, nai seleiwau makamakalivata ena laubasikataka na mina: sa tauvi koya na domobula.
26A butobuto kecega ena vuni tu e nona yasana vuni: a buka sa sega ni irivi ena kati koya; ena ca ko koya sa vo tiko e nona vale.
27Ena tukuna na nonai valavala ca ko lomalagi; ena tu cake talega vua ko vuravura.
28Ena lako tani nai yau sa tubu e nona vale, ena dave yani e na siga ni cudru i Koya.
29O qo nai votavota ni tamatai valavala ca mai vua na Kalou, kei na ka sa rotaka na Kalou me nona.
Who We AreWhat We EelieveWhat We Do
2025 by iamachristian.org,Inc All rights reserved.
