Ai Vola Kei Jope 19 - AI VOLA TABU（FIJ1864）

Sa cavuta ko Jope na nodra tawa loloma na wekana, 1-22. Sa tukuna na nona, vakabauta nai Vakabula, 23-29.

1A SA vosa ko Jope, ka kaya,

2A cava na kena dede mo dou vakararawataka na yaloqu, ka butuqaqi au e na vosa?

3Sa vakatini na nomudou vosavakacacataki au: dou sa sega ni madua ni dou sa loma-kaukauwa vei au.

4Ia keʼu sa cala dina ga, ke sa tiko ga vei au na noqu cala.

5Kevaka e dina ni dou sa via vakalevulevui kemudou vei au, ka via cavuta vei au na ka kaʼu rogo ca kina:

6dou kila o qo ni sai koya na Kalou sa vakabalei au, ka sa lawavaki au e nona lawa.

7Raica, kaʼu sa qoqolou e na vuku ni valavala kaukauwa, ia ka sa sega e rogo mai: au sa kaci vakadomoilevu, ia sa sega e lewa mai.

8Sa sogolatia na noqu sala ko koya meʼu dredre ni lako, a sa vaka-butobutotaka na noqui lakolako.

9Sa luvata tani vei au na noqui ukuuku, a sa kauta tani nai sala e na uluqu.

10Sa vakarusai au e na veiyasana, ia kaʼu sa yali: a sa cavuivuvu na ka kaʼu sa vakararavi kina, me vaka na kau.

11Sa vakacaudreva talega vei au na nona cudru, a sa nanumi au meʼu vaka e dua vei ira na nona meca.

12Sa lako vata mai ko ira na nonai valu, era caramaka na nodra sala me rawai au, era vakavolivolita vakaivalu na noqui tikotiko.

13Sa vakayawataka vei au na wekaqu, a ra sa qai lomavakatani mai vei au ko ira na kai noqu.

14Sa ra yali na wekaqu, a ra sa guilecavi au ko ira na noqui tau.

15O ira era tiko e noqu vale, kei ira na noqu vada, era nanumi au me vulagi: au sa kai tani e matadra.

16Au a kaciva na noqu tamata, a sa sega ni vosa mai; au a vakamasuta e na gusuqu.

17Sa ka tani vua na watiqu na noqu cegu, io, niʼu a vakamasuta ga e na vukudra na luve ni yagoqu.

18Ia ko ira na lalai era beci au; au a tu cake, a ra sa vosacataki au.

19Sa vakasisilataki au ko ira kece na tamata keitou a bose vata: ia ko ira kaʼu a lomana era sa vuki rubu vei au.

20A suiqu sa kabita na kuliqu kei na lewequ, ia kaʼu sa dro bula ga kei na kuli ni batiqu.

21Dou lomani au mai, dou lomani au mai, oi kemudou na wekaqu; ni sa tarai au na liga ni Kalou.

22A cava dou sa vakacacani au kina me vaka na Kalou, ka sa sega ni dou cegu e na yagoqu?

23Me volai mada na noqu vosa! me ceuti mada ki nai vola!

24me ceuti e na peni aironi kei na uma ki na vatu me tawa oti rawa!

25Niʼu sa kila ni sa bula tiko na noqui Vakabula, ena tu talega e vuravura e na siga maimuri:

26ia ni sa cucula oti na kuliqu o qo, kaʼu na kunea ga na Kalou e na yagoqu:

27o koya kaʼu na raica vakai au ga, ka kunea e na mataqu, ka sega ni dua tani; ni sa vakarusai oti e lomaqu na noqui ivi.

28Ia dou kaya, Keitou sa vakacacani koya e na vuku ni cava? ni sa kune vei au na vu ni ka dina.

29Dou rerevaka nai seleiwau: ni sai sau ni cudru nai seleiwau, mo dou kila ni sa dua na siga ni lewa.