Ai Vola Kei Jope 18 - AI VOLA TABU（FIJ1864）

Sa cavuti Jope ko Pilitati me yaloviavialevu ka yalolekaleka, 1-4. Sa tukuna tale na ca ena yacovi ira nai valavala ca, 5-21.

1SA qai vosa ko Pilitati na luve i Sua, ka kaya,

2O na vakaotia ninaica na vosa? mo vakarorogo mai, keitou na qai vosa.

3A cava keitou sa nanumi kina me manumanu; ka vakasauri me ka qeleqelea e matamu?

4Sa dresulaki koya e nona cudru: ena biu laivi beka ko vuravura e na vukumu? se na kauti beka tani na uluvatu mai na kena yasana?

5Ia na nodra rarama nai valavala ca ena bokoci; ena sega talega ni serau na lidi ni nona buka.

6Ena butobuto na rarama e na nona vale malo, ena bokoci vata kaya talega na nona cina.

7A nona lako vakaukauwa ena vakaosoosotaki mai, ena vakabalei koya talega na nona lewa.

8Ni sa biuti ki na lawa ko koya e na vuku ni yavana dina ga, sa lako voli tu e na dela ni cori.

9Ena rawai koya na tudai e na bukubuku-ni-yavana; ena gumatua vua ko koya na daubutako.

10Sa vuni e na, qele na kenai cori, kei na kenai soki e na sala.

11Ena vakarerei koya na ka rerevaki e na veiyasana, ka vakidroataka na yavana.

12Ena kania na nona kaukauwa na viakana, ena volekata sara na sarisarina na rusa;

13ena kania na kaukauwa ni kulina: a ulumatua kei mate ena kania na luvena.

14A ka sa vakararavi kina ena cavuivuvu mai na nona vale malo, ena vakasavi koya vua na tui dauveivakarerei.

15Ena tiko ga o qori e nona vale, e na vuku ni sa sega ni nona: ena mimiraci mai na sulifure ki nonai tikotiko.

16Ena malai na wakana kira, ka tamusuki laivi na tabana kicake.

17Ena yali na ka e nanumi kina e vuravura, ena sega talega na yacana e na salatu.

18Ena vakasevi mai na rarama ki na butobuto, ena vakasesei tani e vuravura.

19Ena sega na luvena se nona kawa vei ira na nona mataqali, ena sega talega e vo tiko e nonai tikotiko.

20Era na kidacalataka na nona gauna ko ira emuri, me vaka era tauvi rere ko ira eliu.

21Sa vaka dina ga o qo na nodrai tikotiko na tamata ca, a sa vakaoqo na yasana i koya sa sega ni kila na Kalou.