Ai Vola Kei Jope 17 - AI VOLA TABU（FIJ1864）

Sa vakadodonutaka na nona vosa vua na Kalou, 1-5. Era na kidacala na tamata yalododonu e na vukuna, ia ka ra na tawa yalolailai kina, 6-10. Sa vakanananu ki na mate ko koya, 11-16.

1SA takali na noqu cegu; sa oti na noqu siga; sa noqu ga nai bulubulu.

2O ira na veivakalialiai era sa tiko kei au? a mataqu sa koto vata kei na nodra veivakararawataki, se segai?

3Mo virikotora mada, me daru veivakadinadinataki; o cei ko koya ena veitauri liga kei au?

4Ni ko sa tabonaka na lomadra me ra kakua ni vuku; o koya o qo ko na sega kina ni vakalevui ira.

5O koya sa vosaveicavilaki vei ira na wekana, ena boko na matadratou na luvena.

6Sa cakavi au talega ko koya meʼu tukuni me ka lialia vei ira na tamata; ia kaʼu sa ka vakasisila e matadra.

7A sa kabukabu na mataqu e na vuku ni rarawa, a sa vaka na yaloyalo na tikiqu kecega.

8Ena kidroa ko ira na yalododonu e na ka o qo, ena yavala na tawa cala me vorati koya na dauveivakaisini.

9Ia na yalododonu ena lako dei e na nona sala, o koya talega sa liga savasava ena kaukauwa cake tikoga.

10Ia koi kemudou kecega, dou saumaki mada mai: niʼu sa sega ni kunea e dua na tamata vuku vei kemudou.

11Sa lako tani na noqu siga; sa muduki tani na noqui naki, ia na vakanananu ni lomaqu.

12Sa vuki na siga me bogi; sa lekaleka na rarama e na vuku ni rarawa.

13Au sa waraka nai bulubulu me noqu vale: au sa cakava na noqui mocemoce e na butobuto.

14Au a kaci yani ki na vuca, Sa tamaqu ko iko: ki na baca, O; sa tinaqu kei na ganequ.

15Sa qai evei na ka meʼu nanuma? ia na ka kaʼu sa nanuma, o cei ena kunea?

16Ena lako sobu ga ki nai sogo ni bulubulu; ni keirau vakacegu vata e na kuvu-ni-soso.