Ai Vola Kei Jope 16 - AI VOLA TABU（FIJ1864）

Sa vunauci iratou na wekana ko Jope e na vuku ni nodratou tawa loloma, 1-5; a sa tukuna ni sa ka lomani ko koya, ka sa yalododonu ga, 6-22.

1SA qai vosa ko Jope, ka kaya,

2E vuqa na ka vakaoqo kaʼu sa rogoca: na dau-veivakacegui vakararawa koi kemudou kecega.

3Ena oti ninaica na vosa wale? se na cava beka sa vakadoudoutaki iko mo vosa mai?

4E rawarawa meʼu vosa talega me vakataki kemudou: kevaka kemudou sa noqui sosomi, e rawarawa meʼu vakalevutaka na vosa vei kemudou, ka kurea na uluqu vei kemudou:

5ia kaʼu a qai vakaukauwataki kemudou ga e na gusuqu, ia ni sa yavavala na tebenigusuqu, sa na qai malumu kina na nomudou rarawa.

6Keʼu sa vosa, ke sa sega ni malumu kina na noqu rarawa: kevaka kaʼu sa cegu ni vosa, a cava me seavu kina vei au?

7Ia o qo sa qai vakaocai au ko koya: o sa vakayalia na wekaqu kecega.

8Ia ko sa vauci au matua e na noqu mate, o qori sa tukuni au: ia na noqu suivotu sa tu cake mai, a sa vakatakilai au ki mataqu.

9Sa dresulaki au e na nona cudru, a sa cati au: sa vakase-quruquru vei au e na batina; o koya na noqu meca sa mata cudrucudru mai vei au.

10Era sa dalaga vei au e na gusudra; era sa yavita na baluqu e na veivakalialiai; era sa yalovata me vakacacani au mai.

11Sa soli au yani na Kalou vei ira na tamata ca, a sa biuti au yani ki na ligadra nai valavala ca.

12Au a tiko vakacegu, a sa qai musuki au ko koya; sa taura na domoqu talega, ka vorolaki au; sa vakaturi au meʼu nona ka me vanavana kina.

13Sa vakavolivoliti au ko ira na nona dauvanavana; sa tasea na toloqu ko koya, ka sega ni vakacegu; sa livia na miqu ki na qele:

14sa daumusuki au wasoma; sa cici vakaivalu mai vei au me vaka na tamata yagolevu.

15Au sa cula nai sulu taqarotu ki na kuliqu, ka biuta sobu na noqu totoka ki na kuvu-ni-soso.

16A mataqu sa dukave-luvelu e na tagi, a sa tauca na dakudaku-ni-mataqu na yaloyalo ni mate:

17sa sega e na vuku ni sa tu e ligaqu nai valavala tawa dodonu: a noqu masumasu talega sa savasava.

18I qele, mo kakua ni ubia na kequ dra, me kakua talega na tikina e vuni kina noqu tagi.

19O qo talega, raica, sa tiko mai lomalagi ko koya sa vakadinadina vei au, ia sa tiko maicake ko koya sa lewai au.

20Sa vakalialiai au ko iratou na wekaqu; ia na mataqu sa sovara ga na kena wai vua na Kalou.

21Me tara mada vua na tamata me veilewai kaya na Kalou, me vaka na tamata sa veilewai kaya na wekana!

22Ni na sa oti mada na yabaki e vica ga, kaʼu na qai lako yani e na sala kaʼu na sega ni lako tale maikina.