Ai Vola Kei Jope 15 - AI VOLA TABU（FIJ1864）

Sa vunauci Jope ko Elifasi e na vuku ni sa vakadonui koya vakai koya, 1-16; a sa tukuna na nodra tawa cegu rawa na tamata ca, 17-35.

1SA qai vosa ko Elifasi na kai Temani, ka kaya,

2Me cavuta li na vuku tawa yaga na vuku, ka vakamamautaka na ketena e na cagi tokalau?

3Me vosataka beka na vosa tawa yaga? kei nai vakavuvuli sa sega ni vakabetena?

4Ia ko iko, ko sa biuta tani na rere, ka tarova na masu e na mata ni Kalou.

5Ni sa tukuna na gusumu na nomui valavala ca, ko sa digitaka na vosa dauveivaqaseni.

6A gusumu ga sa vakacalai iko, ka sega koi au: ia na tebenigusumu ga sa tukuni iko.

7O iko beka nai matai ni tamata ka sucu? se ko buli mada eliu ko iko ka qai buli emuri na veiulu-ni-vanua?

8O sa rogoca beka na bose vuni ni Kalou? se ko sa tarova li na vuku me nomu ga?

9A cava ko kila, me keitou tawa kila talega? se ko vakasama na cava, me sega talega vei keitou?

10Sa tiko vei keitou na ulu sika kei na qase dina talega, sa gone ko tamamu.

11Sa ka lailai beka vei iko na veivakacegui ni Kalou? se dua beka na ka vuni sa tu vei iko?

12A cava sa kauti iko vakatani kina na lomamu? se cava sa goleva na matamu,

13mo sa vakaukauwataka kina na yalomu vua na Kalou, ka laiva na gusumu me cavuta mai na vosa vakaoqori?

14A cava na tamata, me savasava ko koya? kei koya sa sucu vua na alewa, me yalododonu ko koya?

15Raica, sa sega ni vakadinati ira na nona era yalosavasava; ia sa sega ni savasava na lomalagi e matana.

16A sa vakaevei na kena vakasisila kei na kena dukadukali na tamata, o koya sa daugu-nuva na ca me vaka na wai?

17Au na vakatakila vei iko, rogoci au mai; ia na ka kaʼu a raica kaʼu na tukuna;

18o qori era sa tukuna maivei ira na nodra qase ko ira na vuku, a ra sa sega ni vunia:

19o ira ga ka soli kina ko vuravura, ka sega na kai tani me veilakovi kei ira.

20Sa dauvakararawataki koya vakai koya na tamata ca e na nona siga kecega, i a sa vunitaki vua na dauivalavala kaukauwa se na vica beka na nona yabaki.

21Sa rorogo tu e daligana na ka rerevaki: ni sa sautu tiko, ena yacovi koya na dau-veivakarusai.

22Sa sega ni dinata ni na lesu tale mai na butobuto, a sa waraki koya tu nai seleiwau.

23Sa qara sese voli tu na kena, ka kaya, Sa evei? sa kila ko koya ni sa voleka sara vua na siga ni butobuto.

24Sa vakarerei koya na rarawa kei na yaluma: ena gumatua vua, me vaka na tui sa vakarau ki nai valu.

25Ni sa laveta na ligana vua na Kalou, a sa vakaukauwataki koya me veivala kaya sa Kaukauwa.

26Sa cici vakadomoqa vei koya, e na nonai sasabai sukusukura:

27e na vuku ni sa ubia na matana e nona uro, a sa uro mai na nonai ivi.

28Ia ena tiko ga ko koya e na veikoro lala, e na veivale sa sega e vakatawa, ka sa voleka ni rusa:

29ena sega ni vutuniyau ko koya, ena sega ni dei na nona ka, ena sega talega ni vakadedetaka na kena vinaka e vuravura.

30Ena sega ni lako tani mai na butobuto; ena malai yani na tabana e na yameyame-ni-buka, ena takali talega ko koya e na cegu ni gusu i Koya.

31Me kakua na dau vakacalai me vakararavi e na ka tawa yaga: ni na ka tawa yaga na kenai sau.

32Ni sa tawa taucoko na kena gauna sa rusa ga, ena sega talega ni bulabula na tabana.

33Ena kuretaki sobu na vuana vou me vaka na vaini, ena mimira na sena me vaka na olive.

34Ni na lala na nodrai soqosoqo na dauveivakaisini, ia na buka ena katia na nodra veivale era tarai yau ni vere.

35Era sa kunekune taka na ca, ka vakasucuma na lasu, a sa vakarautaka na veivakaisini na lomadra.