Ai Vola Kei Jope 14 - AI VOLA TABU（FIJ1864）

Ni sa ka lekaleka na bula ni tamata, ka sa tawa bula tale e vuravura ni sa mate, sa masuta na Kalou ko Jope me lomani koya mai.

1A TAMATA sa sucu mai na alewa sa vica walega na nona siga, a sa vutu ni rarawa.

2Sa lako mai ko koya me vaka na se ni kau, a sa tamusuki tale: sa dro talega me vaka na yaloyalo, a sa sega ni tiko dei.

3Ia ko sa yadra va beka e dua sa vakaoqo, ka kauti au mai me daru veilewai kei iko?

4O cei me kauta rawa mai na ka savasava mai na ka tawa savasava? sa sega e dua.

5E na vuku ni sa lokuci tu na nona siga, ka sa tu vei iko nai wiliwili ni nona vula, ni ko sa lesia talega na kenai yalayala me kakua ni sivia;

6mo gole tani mada kina vua, me vakacegu ko koya, me vakaotia mada na nona siga, me vaka na tamata voli.

7Ni sa daudinati, kevaka sa ta sobu na kau, ena tubu tale, ena sega talega ni yali na kena tubu vou mai.

8Kevaka sa vuca mai na wakana e na qele, ka sa mate na vuna e na soso;

9ena tubu mai ni sa boica na wai, ena tubura na tabana me vaka na kau sa tei.

10Ia sa mate ga na tamata, a sa ka yaliyali: ia sa ciba na tamata, a sa evei ko koya?

11Me vaka sa dauyali na wai mai na wasawasa, a sa daudi ka mamaca na uciwai:

12sa vakakina vua na tamata, sa daukoto sobu, ka sega ni tu cake tale: era na sega ni yadra, se vakaturi cake mai na nodra moce, ka me yali mada na lomalagi.

13Mo vunitaki au mada e nai bulubulu, ka tabonaki au, me oti mada na nomu cudru, ka lokuca vei au e dua na siga, ka nanumi au!

14Kevaka sa ciba na tamata, ena bula tale ko koya? au na waraka na siga kecega sa loku vei au, me yaco mada na noqu vakamataliataki.

15O na kaci mai, kaʼu na rogo yani vei iko: o na vinakata na cakacaka ni ligamu.

16Ia o qo ko sa wilika nai cavu cavu ni yavaqu: kakua ni daunanuma na noqui valavala ca.

17Sa sogodregati e na taga na noqu talaidredre, ia ko sa cula kina na noqui valavala ca.

18Sa yaco dina me ka wale na ulu-ni-vanua sa lutu sobu; a vatu talega, sa biuti tani mai na kena yasana:

19sa solota na vatu na wai: o sa luvuca na ka sa tubu mai na kuvu-ni-qele; ia ko sa dauvakania talega na vakanananu ni tamata.

20O sa gumatua tikoga vua, a sa takali ko kova: o sa vakatanitaka na matana, ka vakatalai koya yani.

21Sa vakarokorokotaki mai ko iratou na luvena, a sa sega ni kila ko koya; a ratou sa vakasivoi, a sa sega ni vakasama ko koya.

22Ia ena rarawa na lewena e ubi kina, ena tagi talega e lomana na yalona.