Ai Vola Kei Jope 13 - AI VOLA TABU（FIJ1864）

Sa vunauci iratou na wekana ko Jope, 1-12; a sa tukuna na nona vakabauta, 13-19. Sa vakamamasu ko koya vua na Kalou, 20-28.

1RAICA, a ka kecega o qori sa kunea na mataqu, sa rogoca na daligaqu ka kila.

2A ka dou sa kila, kaʼu sa kila talega; kaʼu sa sega ni uasivi sobu vei kemudou.

3E dina, kaʼu sa via vosa vei Koya sa Kaukauwa, au sa vinakata me keirau vei-tarogi kaya na Kalou.

4Ia koi kemudou, dou sa dautulia na lasu, dou sa vuniwai tawa yaga kecega.

5Mo dou tiko lo sara mada! ena sa nomudou vuku ga o qori.

6Dou rogoca mada na noqu vakatusa, ia dou vakarorogo ki na vosa veilewai ni tebenigusuqu.

7Dou na vosa ca beka e na vukuna na Kalou? dou na vosa veivakaisini e na vuku i koya?

8Dou na vinakata loa beka na matana? dou na ia na veileti e na vuku ni Kalou?

9Sa vinaka beka me vakatarogi kemudou ko koya? se dou sa vakalialiai koya, me vaka ni sa ia na veivakalialiai na tamata?

10Ena vunauci kemudou dina ko koya, kevaka dou sa vakadonui ira lo na tamata.

11Ena sega beka ni vakarerei kemudou na nona ka vakaturaga? ena tawa tauci kemudou na rerevaki koya?

12A nomudou vosa vakaibalebale nai bole dravu, a yagomudou na yago qele.

13Dou galuvi au mada ga, meʼu vosa koi au, me qai veitalia se cava ena yacovi au.

14A cava meʼu taura kina na lewequ e batiqu? ka tokara na noqu bula e ligaqu?

15Kevaka sa vakamatei au ko koya, kaʼu na vakararavi ga vua: ia na noqui valavala kaʼu na vakadinadinataka e matana.

16Sai koya talega kaʼu na bula kina; ni sa sega na tamata dauveivakaisini me toro ki matana.

17Dou rogoca vakavinaka na noqu vosa, kei na noqu vakatusa e na daligamudou.

18Raica, kaʼu sa qai vakarau tu ki na veilewai: au sa kila niʼu na vakadonui.

19O cei ena veilewai kei au? kevaka kaʼu na qai galu o, kaʼu na ciba.

20E rua ga na ka mo kakua ni kitaka vei au: kaʼu na qai sega ni vunitaki au vei iko.

21Mo kauta vakayawa tani vei au na ligamu: me kakua talega ni vakarerei au na ka rerevaki maivei iko.

22Mo qai kaci mai, kaʼu na qai vosa: seʼu vosa koi au, mo qai vosa mai vei au.

23E vakavica beka na noqu caka cala, kei na noqui valavala ca? mo vakatakila vei au na noqu talaidredre kei na noqui valavala ca.

24A cava ko sa vunia kina na matamu, ka nanumi au me nomu meca?

25O na vutu vorota beka na dra-ni-kau sa cagina? se cicimuria na vu-ni-sila mamaca?

26Ni ko sa vola na ka vakararawa vei au, ka votai au e na noqui valavala ca niʼu a cauravou.

27O sa vesuka talega na yavaqu e nai vesu kau, ka vakaraica matua na noqui lakolako kecega; a sa vakawena na qeteqete ni yavaqu:

28ia ko koya o qori sa malai yani me vaka na ka sa vuca, me vaka nai sulu sa kania na sarasara.