Ai Vola Kei Jope 12 - AI VOLA TABU（FIJ1864）

Sa tabana yani ko Jope na nodratou vosa na wekana, 1-5; a sa vakadinadina ni sa kaukauwa sara na Kalou, 6-25.

1A SA vosa ko Jope, ka kaya,

2Sai kemudou dina ga na tamata, ia na vuku ena mate vata kei kemudou!

3Ia sa tu talega vei au na lomavuku me vaka sa tu vei kemudou; au sa sega ni uasivi sobu vei kemudou: ia ko cei sa tawa kila na ka vakaoqori?

4Au sa vaka e dua sa vakalialiai e na kai nona, e dua sa masu ki na Kalou, a sa vosa mai vei koya: ia sa vakalialiai na tamata dodonu ka tawa cala.

5O koya sa tiko cegu sa nanuma e lomana ni sa cina e beci ko koya sa voleka ni tidara na yavana.

6Sa sautu na nodrai tikotiko na daubutako, a sa dei na nodra tiko era sa vakacudruya na Kalou; ia na tamata sa dausoli ka kina na Kalou.

7Ia mo taroga mada na manumanu ni vanua, era na vakavulici iko; kei ira na manumanu ni lomalagi, era na tukuna vei iko:

8se vosa ki na vanua, ena vakavulici iko: ia na ika talega ni waitui ena vakatusa vei iko.

9O cei me tawa kila ena ka kecega o qori, ni sa cakava na ka o qo na liga i Jiova?

10e sa tiko e ligana na nodra cegu na ka kecega sa bula, kei na yagodra na tamata kecega.

11Sa sega beka ni vakatovolea na vosa na daliga? ka sega beka talega ni tovolea na kena kakana na gusu?

12Sa tu na vuku vei ira na qase; kei na yalomatua vei ira sa vuqa na nodra siga.

13Sa tu vei Koya na vuku kei na kaukauwa; sa nona na lewa dina kei na yalomatua.

14Raica, sa basuka sobu ko koya, a sa sega e tara tale: sa sogolatia na tamata, a sa sega e dolava.

15Raica, sa tarova na wai, a sa di: sa vakatauca mai, a sa laʼki luvuci vuravura.

16Sa tu vei koya na kaukauwa kei na vuku: sa nona ko koya sa vakacalai kei koya sa vakacala.

17Sa kauti ira vakabobula tani na daubose, a sa vakasesei ira na dauveilewai.

18Sa sereka na nodrai vesu na tui, a sa vauca na tolodra e nai vau.

19Sa kauti ira vakabobula tani na turaga, a sa vakabaleti ira na qaqa.

20Sa vakatakalia na nodra vosa na dau-dina, a sa kauta tani na nodra yalomatua na qase.

21Sa vakaisini ira na turaga, a sa sereka nai vau ni tolodra na qaqa.

22Sa vakarairaitaka mai na ka titobu mai na butobuto, a sa kauta mai ki na rarama na yaloyalo ni mate.

23Sa vakalewevu-qataki ira na veimatanitu, a sa vakarusai ira tale; sa vakalevuya na veimatanitu, a sa vakalailaitaka tale.

24Sa vakatakalia na nodra yalomatua na turaga ni kai vuravura, a sa vakasesei ira voli e na lekutu sa sega kina na sala.

25Era vakayayamo voli e na butobuto ka sa sega na rarama, a sa qisi ira me ra yatayata tu me vakataki koya sa mateni.