Ai Vola Kei Jope 11 - AI VOLA TABU（FIJ1864）

Sa vunauci Jope ko Sofari e na vuku ni nona vakadonui koya, 1-6. Sa tukuna ko koya ni sa ka vakaidina sara na vuku ni Kalou, 7-12; a sa vakarota na veivutuni vei Jope, 13-20.

1SA qai vosa ko Sofari na kai Neema, ka kaya,

2Me sega beka ni tabani yani na vosa e vuqa? se na vakadonui beka na tamata dauvosa?

3me ra tiko lo beka na tamata e na vuku ni nomu lasu? ia me sega beka e vakamaduataki iko ni ko sa ia na veivakaisini?

4ni ko sa kaya, Sa dodonu na noqui vakavuvuli; au sa savasava talega e matamu.

5Ia me vosa mada na Kalou, ka dalaga na tebenigusuna vei iko;

6ka vakatakila vei iko na ka vuku e vuni tu ni sa levu, ka lailai e sa kilai! Mo qai kila ni sa ka lailai e taroga na Kalou vei iko, ka ka levu na nomui valavala ca.

7Ni ko sa vakasaqara, ko na kilai koya rawa beka kina na Kalou? ko na kilai Koya deivaka rawa sa Kaukauwa?

8sa lolovira ko lomalagi; a cava ko kitaka rawa? sa matia ko bulu; a cava ko kila rawa?

9A kenai vakarau sa balavu ka lekaleka ko vuravura, a sa rabailevu ka rabailailai na wasawasa.

10Kevaka sa vauca ka sogolatia, ka vakasoqona vata, o cei me tarovi koya?

11Ni sa kilai ira na tamata lasu; sa kunea talega na caka ca; ia ena sega beka ni vakanananu kina?

12Ni sa viaviavuku na tamata lialia, ia ka sa sucu ga me vaka na luve ni asa kila.

13Kevaka ko sa vakarautaka na yalomu, ka dodoka na ligamu vei koya;

14kevaka sa tu na ca e ligamu, mo biuta vakayawa, ia me kakua ni tiko nai valavala ca e na nomu veivale.

15Ni ko na qai ta cake e na matamu ka tawa tauvi duka; io, ko na tiko dei, ka tawa rere:

16ni ko na guilecava na rarawa; ka nanuma me vaka na wai sa lako tani yani:

17ia na nomu bula ena uasivi cake e na rarama ni siga levu; o na cila yani, o na tautauvata kei na sabogibogi.

18Ia ena dei na lomamu, ni sa namaka na vinaka; ia ko na keli ga, ka koto vinaka sobu.

19Ia ko na koto sobu, ka sega e vakarerei iko; a ra na vakamasuti iko na lewe vuqa.

20Ia ena oca wale na matadra nai valavala ca; ena yali na nodrai drodro, ia na ka era namaka ena vaka na ciba.