Ai Vola Kei Jope 10 - AI VOLA TABU（FIJ1864）

Sa vosa vua na Kalou ko koya e na vuku ni nona rarawa, a sa kere me vakacegui vakalailai mada ni sa bera na mate.

1SA oca na lomaqu e na vuku ni noqu bula; au na laivi au meʼu didi walega; au na vosa ni sa rarawa na yaloqu:

2au na kaya vua na Kalou, Mo kakua ni vakacalai au; mo vakatakila vei au se cava ko sa veileti kina kei au.

3Sa vinaka beka vei iko mo ia na veivakararawataki, mo beca talega na cakacaka ni ligamu, ka cilava na nodra bose nai valavala ca?

4O iko beka ko sa mata vakayago? se ko raica beka me vaka sa raica na tamata?

5Sa tautauvata beka na nomu siga kei na siga ni tamata? se tautauvata na nomu, veiyabaki kei na veisiga ni tamata,

6mo sa vakataroga kina na noqu cala, ka vakasaqara na noqui valavala ca?

7O sa kila niʼu sa sega ni tamata ca; a sa sega e dua e vakabula rawa mai na ligamu.

8Sa oca na ligamu ni mataitaki au, sa cakava kece na tikiqu me vinaka vata; ia ko sa vakarusai au ga.

9Mo nanuma mada, ni ko sa buli au me vaka na qele-ni-kuro; ia ko na vakalesui au tale beka me kuvu-ni-soso?

10O sa livi au yani mei vaka na wai-ni-sucu, ka buli au me vaka nai buli wai-ni-sucu, se segai?

11O sa vakaisulutaki au e na kuliqu kei na lewequ, ka viribaiti au e na suiqu kei na ua.

12O sa solia vei au na bula kei nai loloma, ia na nomu dauraici au na ka sa maroroi kina na yaloqu.

13Ia na ka o qo ko sa vunia e lomamu: au sa kila ni sa tiko vei iko na ka o qori.

14Kevaka kaʼu sai valavala ca, ko sa qai dikevi au, o na sega talega ni vakadonui au mai na noqu caka ca.

15Kevaka kaʼu sai valavala ca, kaʼu na ca; ia kevaka kaʼu sa caka dodonu, kaʼu na sega ga ni ta cake e na uluqu. Au sa kidroa sara; ia mo raica na noqu rarawa;

16ni sa tubu ga. O sa vakasavi au me vaka na laioni daukata: ia ko sa baki lesu vakidacala tale mai vei au.

17O sa daulesia na nomu ka vou e so me tukuni au vakaca, o sa vakalevutaka na nomu cudruvi au; sa dauyaco vei au na ka vou kei nai valu.

18A cava ko a kauti au kina mai na kete? keʼu a ciba, ka tawa kunei au e dua na mata, ke sa vinaka.

19Kaʼu a qai vaka niʼu a sega ga, kaʼu a sa qai colati mai na kete ki nai bulubulu.

20Sa ka lailai, se sega, na noqu siga? mo cegu, laivi au ga, meʼu vakacegu vakalailai mada,

21meʼu qai lako yani ka sega ni lesu tale mai, ia ki na vanua butobuto kei na yaloyalo ni mate;

22na vanua butobuto, me vaka na butobuto dina ni yaloyalo ni mate, a sa sega ni caka vinaka, a sa vaka na butobuto na kena rarama.