Ai Vola Kei Jope 9 - AI VOLA TABU（FIJ1864）

Sa vakadinadina ko Jope ni sa dodonu na Kalou, a sa sega e veivala kaya rawa, 1-21. Sa sega ni rairai ni sa cala na tamata ni sa yacovi koya na ka ca, 22-35.

1SA qai vosa ko Jope, ka kaya,

2Au sa kila vakaidina ni sa vakakina: ia ka sa dodonu rawa vakaevei na tamata e na mata ni Kalou?

3Kevaka sa via veileti kaya, ena sega ni vosa rawa vua ki na ka e dua e na ka e udolu.

4Sa vuku na lomana, a sa ka vakaidina na nona kaukauwa: o cei sa vakalomaqataki koya vua, ka sa sautu kina?

5O koya sa kauta tani na veiulu-ni-vanua, a ra sa sega ni kila, o koya sa vukica e nona cudru:

6o koya sa yavalati vuravura tani mai na kena yasana, a sa veitosoyaki na kena duru:

7o koya sa vunauca na siga, a sa sega ni cadra; a sa sogolatia na kalokalo:

8o koya sa birika vakai koya ga na lomalagi, a sa butuka tu na dela ni ua ni wasawasa:

9o koya sa cakavi Arikituro, kei Oreoni, kei Peliatisi, kei na veiyasana vuni e na mata ni ceva:

10o koya sa daucakava na ka levu sa sega ni kilai rawa; ia na ka e veivakidacalataki sa sega ni wiliki rawa.

11Raica, sa lako volekati au mai, kaʼu sa sega ga ni raica: sa lako voli yani, kaʼu sa sega ga ni kunea.

12Raica, sa kauta tani ko koya, o cei me vakasuka rawa? o cei me kaya vua, A cava ko sa kitaka?

13Kevaka sa sega ni tarova nona cudru na Kalou, sa ra na vakacuva e rukuna ko ira na dauveivuke e viavialevu.

14Sa dredre vakalevu vei au meʼu vosa vua, se digitaka na vosa meʼu veilewai kaya?

15Ia kevaka kaʼu sa yalododonu, kaʼu na sega ga ni vosa vua, kaʼu na vakamamasu ga vua sa lewai au.

16Kevaka kaʼu a kaci, ka rogo mai vei au ko koya, kaʼu na sega ga ni dinata ni sa vakarogoca na domoqu.

17Ni sa vorolaki au ko koya e na cava, ka vuetaki au vakalevu wale.

18Sa sega ni laivi au meʼu cegu rawa, a sa vakamarautaki au e na ka gaga.

19Kevaka kaʼu cavuta na kaukauwa, raica, sa kaukauwa ko koya: se na lewa, o cei me na lokuca mai na neirau siga?

20Kevaka kaʼu sa vakadonui au, ena vakacalai au na gusuqu: kevaka kaʼu sa kaya kaʼu sa tawa cala, ena vakatakilai au niʼu sa yalovakatani.

21Kevaka kaʼu sa tawa cala, kaʼu na sega ni kila na yaloqu: kaʼu na vakasisilataka na noqu bula.

22Sai koya vata ga kaʼu sa kaya, Sa vakarusa ko koya na yalododonu kei nai valavala ca.

23Kevaka sa vakidacala na kena ia na veivakamatei na kuita, ena dredrevaka ko koya na ka era sa vakatovolei kina na tawa cala.

24Sa soli ko vuravura ki na ligadra nai valavala ca: sa tabonaka ko koya na matadra na dauveilewai; kevaka e segai, sa qai evei, se ko cei ko koya?

25A sa qai totolo na noqu siga ka bera nai talaki e daucici; sa dro tani, ka sega ni kunea na ka vinaka.

26Sa lako tani yani me vaka na waqa dauqai: me vaka na ikeli sa vukaca na kena.

27Kevaka kaʼu sa kaya, kaʼu na guilecava na noqu didi, kaʼu na biuta na noqu mataveveku, ka vakalecataki mai:

28kaʼu sa qai kani yatequ e na vuku ni noqu rarawa kecega; kaʼu sa kila ni ko na sega ni vakadonui au.

29Au sai valavala ca, meʼu qai oca wale vakacava?

30Kevaka kaʼu sa vuluvulu e na wai ni uca-vulavula, ka vakasavasavataka na ligaqu e na vuso;

31o na qai vakalomoci au ki na oruoru, ena qai vakasisilataki au na noqui sulu.

32Ni sa sega ni tamata ko koya me vakataki au, meʼu vosa rawa vua, me keirau mai veilewai vata kaya:

33sa sega talega e dua na dautataro me tabaki keirau ruarua e na ligana.

34Me kauta tani mada vei au ko koya na nona kuita, ia me kakua ni vakadomobulataki au na nona veivakarerei:

35au na qai vosa, ka sega ni rerevaki koya; ia ka sa sega ni vakakina vei au.