Ai Vola Kei Jope 8 - AI VOLA TABU（FIJ1864）

Sa kaya ko Pilitati ni sa dodonu na Kalou e na ka e cakava, 1-7. Sa vaka ni sa daucudruvi eliu na dauveivakaisini, 8-19. Sa kaya talega ni sa ka dodonu sa yaco vei Jope, 20-22.

1SA qai vosa ko Pilitati na luve i Sua, ka kaya,

2E bogi vica vata mo cavuta kina na ka vakaoqo? e bogi vica vata me cagi kaukauwa kina na vosa ni gusumu?

3Sa ia beka na Kalou na lewa tawa dodonu? se vakacala beka na ka dodonu ko Koya sa Kaukauwa?

4Kevaka era sai valavala ca vua ko iratou na luvemu, a sa vakatalai ira tani ko koya e na vuku ni nodra talaidredre;

5kevaka ko sa vakasaqara tau-donu na Kalou, ka ia na nomu vakamamasu vei Koya sa Kaukauwa;

6kevaka ko sa savasava ka dodonu; ena sa qai yadra dina sara mai e na vukumu ko koya, ena vakasaututaka talega na nomui tikotiko e dodonu.

7Kevaka sa ka lailai na nomui vakatekivu, ena ka levu sara ga na nomui otioti.

8Ia mo taroga mada nai tabatamata makawa, ka gumatua ni tarogi ira na nodra qase:

9(ni sa tubu wale e na noa ko keda, ka sega ni kila e dua na ka, ni sa yaloyalo wale na noda siga e vuravura:)

10era na sega beka ni vakavulici iko, ka tukuna vei iko, ka cavuta na vosa mai na lomadra?

11Ena tubu li na vico ni sa sega na oruoru? ena tubu na taria ni sa sega na wai?

12Ni sa drokadroka tu, ka sega ni tamusuki, sa malai rawarawa ga o qori, ka dredre na co kecega.

13Sa vakakina na nodra sala kecega era sa guilecava na Kalou: ia ena tawa yaco na ka e namaka na dauveivakaisini:

14ena muduki laivi na ka sa namaka ko koya; ena viritalawalawa ga na ka e vakararavi kina.

15Ena ravita na nona vale, ia ena sega ni tu: ena taura matua, ia ena sega ni dei.

16Sa drokadroka tu ko koya e na mata ni siga, a sa tubu na tabana e nona were.

17Sa vere-verea tu na wakana e nai binibini; sa kunea na tikina vatuvatu.

18Kevaka ena cavu laivi ga ko koya mai na nona yasana, ena qai cakitaki koya, ka vaka, Au a sega ni kunei iko.

19Raica, sa vaka ga o qo na nona reki, ia ena tubu e so tani tale mai na qele ko ya.

20Raica, ena sega ni biuta tani na tamata yalododonu na Kalou, ena sega talega ni vukei ira nai valavala ca:

21ena vakasinaita mada na gusumu e na dredre, kei na tebenigusumu e na rereki:

22o ira era cati iko era na vakaisulutaki e na madua; ena yali sara talega na nonai tikotiko nai valavala ca.