Ai Vola Kei Jope 7 - AI VOLA TABU（FIJ1864）

Sa vaka ko Jope ni sa dodonu na nona via mate, 1-11. Sa didivaka na ka e so vua na Kalou, 12-21.

1SA sega beka nai valu me ia na tamata e vuravura? a nona siga sa sega beka ni tautauvata kei na siga ni tamata voli?

2Me vaka ni sa domona sara na malumalu nai talatala, me vaka ni sa namaka tiko nai sau ni nona cakacaka na tamata voli:

3sa noqui votavota vakakina na veivula wale, a sa lesi vei au na bogi ni vutugu.

4Niʼu sa laʼki koto, au sa kaya, Au na duri ninaica, me oti na bogi? kaʼu sa veivukiyaki kotoga, a sa kida na mataka.

5Sa vakaisulu na lewequ e na baca kei na qele vavaku; sa drakusi na kuliqu, ka boi ca mai.

6Sa ka totolo na noqu siga ka berabera na nonai talitali na dautali sulu, a sa vakaoti ka sega na ka meʼu namaka.

7Mo nanuma ni sa cagi ga na noqu bula: ena sega ni kunea tale na ka vinaka na mataqu.

8A mata i koya sa raici au ena sega ni raici au tale: sa raici au na matamu, ia kaʼu sa qai sega ga.

9Sa seavu na o ka lako tani yani; sa vakakina ko koya sa lako sobu ki nai bulubulu, ena sega ni lako cake tale mai.

10Ena sega ni lesu tale mai ki nona vale, ena sega ni kilai koya tale na nona yasana.

11Ia koi au, kaʼu na sega ni tarova na gusuqu; kaʼu na vosa ni sa yaluma na yaloqu; kaʼu na didi ni sa gaga na lomaqu.

12Oi au beka na wasawasa, se na tavuto, mo sa lesia kina nai vakatawai au?

13Niʼu sa kaya, Ena vakalecataki au na noqui mocemoce; ena vakacegui au mai na noqu mate na noqui davodavo;

14o sa qai vakarerei au e na tadra, ka vakadomobulataki au e na raivotu:

15au sa digitaka kina na kuna kei na mate, ka cata meʼu bula:

16au sa vakasisilataka; au sa sega ni via bula tikoga: mo laivi au ga; ni sa ka wale na noqu bula.

17A cava na tamata, mo vakalevui koya kina? ka vakananumi koya kina?

18ka talevi koya e na sabogibogi kecega, ka vakatovolei koya tikoga?

19A cava na kena dede ko sa sega ni gole tani kina vei au, se laivi au tu meʼu tei tiloma mada na noqu weli?

20Au sai valavala ca; a cava meʼu cakava vei iko, o iko sa daumaroroya na tamata? a cava ko sa lesi au meʼu ka mo vanavana kina, au sa yaco kina meʼu ka bibi vei au vakai au ga?

21Ia ko sa sega ni bokoca na noqu caka cala e na vuku ni cava, ka kauta tani na noqui valavala ca? niʼu na qai koto sobu e na kuvu-ni-soso; ia ko na qarai au e na sabogibogi, ia kaʼu sa yali ga.