Ai Vola Kei Jope 6 - AI VOLA TABU（FIJ1864）

Sa tukuna ko Jope ni sa sega ni tagi wale, 1-7. Sa via mate me cegu, 8-13. Sa vunauci iratou na wekana e na vuku ni nodratou tawa loloma, 14-30.

1A SA vosa ko Jope, ka kaya,

2Me vakatovolei dina mada na kena bibi ni noqu rarawa, ia me vakatauvatani e nai vakarau ni bibi kei na ka ca sa yacovi au!

3Ni na sa qai bibi vakalevu ka vakalailai na nuku ni wasawasa: o koya o qo kaʼu sa dredre kina ni vosa.

4Ni sa lau ki lomaqu na gasau i Koya sa Kaukauwa; sa gunuva na yaloqu na kena gaga: sa tuvai valu kivei au na ka rerevaki mai vua na Kalou.

5Sa tagi beka na asa kila ni sa tu na kena co? se via tagi na karavau ni sa kana tiko?

6sa kani rawa beka na ka velavela ni sa sega ni vakamasima? se kamikamica na weli ni yaloka?

7A ka sa bese ni tara na yaloqu, sa qai yaco me vaka na kequ kakana ni tagi.

8Me vakayacori mada na noqu kerekere; ka solia mada na Kalou na ka kaʼu sa domona!

9Ia me vinaka vua na Kalou me vakarusai au; me sereka na ligana, me muduki au tani!

10Au na qai cegu rawa; io, au na qai vakaukauwataki au e na rarawa: me kakua ni vosota ko koya; niʼu a sega ni vunia na vosa i Koya sa Yalosavasava.

11A cava na noqu kaukauwa, meʼu vakararavi kina? se cava na noqui otioti, meʼu via vakabalavutaka kina na noqu bula?

12A noqu kaukauwa na kaukauwa beka ni vatu? se parasa beka na lewequ?

13Sa sega vei au meʼu vukei au, a sa se tani vei au na vuku.

14O koya sa tauvi mate e dodonu me loloma kina na wekana; ia ka sa biuta ga na rerevaki Koya sa Kaukauwa.

15Eratou sai valavala vakailasu na wekaqu mo vaka na uciwai, eratou sa vaka na soniwai e dautakali yani;

16a ya sa vuvu e na vuku ni wai sa cevati, sa vuni kina talega na uca-vulavula:

17ni sa katakata mai o qori, sa yali: ni sa cilavi siga, sa takali sara mai na kena yasana.

18Sa lesu tani na sala ni kenai davedave; sa yaco ga me segai, me yali sara:

19era sa vakasaqara ko ira nai vavakoso lewe ni sala mai Tema; era sa waraka ko ira na lewe ni sala mai Sepa:

20era sa madua e na vuku ni ra a vakararavi kina; era sa lako mai kina, a ra sa taqaya.

21Ni dou sa qai vaka na ka wale; dou sa raica niʼu sa biuti sobu, ia dou sa rere.

22Seʼu sa kaya beka, Dou kauta mai na ka vei au? se, Dou solia vei au nai loloma mai na nomudoui yau?

23se, Dou vakabulai au mai na liga ni meca? se, Dou voli au mai na liga ni kaukauwa?

24Dou vakavulici au, kaʼu na tiko lo; ia dou vakatakila vei au na ka kaʼu sa cala kina.

25A ka kaukauwa vakaidina na vosa dodonu! ia ka cava beka na betena na nomudou vunauci au?

26Dou sa nanuma beka me vunauca na vosa, ia na ka sa cavuta ko koya sa luvu na lomana, sa vaka na cagi?

27Io, dou sa lutuki koya na lu-veniyali, ka kelia na kenai keli na nomudoui tau.

28Ia dou lomavinaka mada, dou raici au mai; ni sa macala ga vei kemudou kevaka kaʼu lasu.

29Dou saumaki mada mai, kakua ni kaya ni sai valavala ca; ia dou saumaki mada, ni sa tu kina na noqu caka dodonu.

30Sa tiko beka nai valavala ca e yamequ? a gusuqu beka sa sega ni kila rawa na ka e ca?