Ai Vola Kei Jope 5 - AI VOLA TABU（FIJ1864）

A ka rarawa sa tubu e na vuku ni ca ni tamata, 1-7. E vinaka vua sa rarawa me nanuma ki na Kalou, 8-16. Ena qai yaga na ka rarawa vua sa vakararavi vei koya, 17-27.

1MO ia mada na kaci, de dua beka me via rogo mai vei iko; ia mo gole beka vei cei vei ira na tamata yalosavasava?

2Ni sa vakamatea na tamata lialia na yaloca, a sa vakarusai koya na tawa vuku na vuvu.

3Au sa kunea na lialia ni sa vakawakana mai: ia kaʼu a kaya vakasauri ni sa ca na nonai tikotiko.

4Sa yawa ni tiko vinaka ko iratou na luvena, a ra sa butuqaqi mai na matamata-ni-koro, a sa sega e Vakabula.

5Sa kania na kedra vuata ko koya sa viakana, a sa kauta tani mai na loma ni kau votovotoa, a sa tiloma na nodrai yau ko koya sa viagunu.

6E dina ni sa sega ni tubu na ca mai na kuvu-ni-soso, a sa sega ni tubu mai na qele na rarawa;

7a sa sucu ga na tamata me rarawa, me vaka ni sa dauvuka cake na lidi-ni-buka.

8Ia koi au kaʼu na qarai koya kina na Kalou, kaʼu na vakalaiva na noqu ka vei koya na Kalou:

9o koya sa cakava tiko na ka levu ka sega ni kilai rawa; na ka e veivakidacalataki sa sega ni wili rawa:

10o koya sa solia na uca ki vuravura, a sa vakatauca na wai ki na veiwere:

11me vakatikori ira kicake era tiko era; me ra laveti cake me tiko vinaka ko ira sa dautagi.

12Sa vakalaboca ko koya na nodrai lawaki na tamata qaseqase, a sa sega kina ni kitaka rawa na ligadra na ka era sagati kina.

13Sa coriti ira na vuku e na nodra qaseqase; a sa biligi sobu na nodra lewa na yalovakatani.

14Era sa ciciva na butobuto ni sa siga tu, a ra sa vakayayamo voli e na siga levu me vaka e na bogi.

15A sa vakabula na dravudravua mai nai seleiwau; mai na gusudra, kei na ligadra na kaukauwa.

16A ka o qo sa nanudei kina ko koya na dravudravua, a sa sogorubu na gusuna na tawa dodonu.

17Raica, sa kalougata na tamata sa vunauca ko koya na Kalou: a ka o qo mo kakua kina ni beca ni sa yaviti iko ko Koya sa Kaukauwa:

18ni sa vakararawataka, a sa vivia talega: sa vuetaka, a sa Vakabula talega e na ligana.

19E na ka rarawa e ono, ena vakabulai iko ko koya: ia ni sa qai vitu, ena sega na ca me tauvi iko.

20Ni sa dausiga, ena vakabulai iko mai na mate: ni sai valu talega, mai na kaukauwa ni seleiwau.

21O na vunitaki mai na kaukauwa ni vosa: ia ni sa lako mai na veivakarusai, ko na tawa rerevaka.

22O na dredre vaka na veivakarusai kei na dausiga: o na sega talega ni rerevaka na manumanu ni vanua.

23Ni dou nai tovata kei na veivatu ni vanua; a ra na veivinakati kei iko na manumanu ni vanua.

24Ia ko na kila talega ni na sautu na nomu vale; ia ko na taleva na nomui tikotiko, ka sega ni cala.

25O na kila talega ni na vuqa na luvemu, ia na nomu kawa ena vaka na co ni vanua.

26O na yaco ki na nomui bulubulu ni ko sa qase vinaka mai, me vaka nai vau sila sa kau mai e na kena gauna.

27Raica, na ka o qo keitou sa vakasaqara ka kunea, a sa dina ga; mo rogoca, ka kila ko iko.