Ai Vola Kei Jope 4 - AI VOLA TABU（FIJ1864）

Sa vunauci Jope ko Elifasi, a sa vaka ni sa yaco ga na cudru, ni Kalou vei ira nai valavala ca, 1-11. Sa tukuna na raivotu me malumalumu mai na yalo i Jope, 12-21.

1SA qai vosa ko Elifasi na kai Temani, ka kaya,

2Kevaka keitou sa vakatovolea me vosa vei iko, ko na yaloca beka? ia ko cei e tarova rawa na vosa?

3Raica, ko a vakavulici ira na lewe vuqa, ia ko a dauvakaukauwataka na liga malumalumu.

4A nomu vosa sa dautokoni koya sa kolai bale; o sa dauvakaukauwataka na duru malumalumu.

5Ia o qo sa yacovi iko, ko sa yalowai; sa tauvi iko, ko sa kidroa.

6Sa qai evei na nomu rere, na nomu vakararavi, na nomu nanudei, kei na nomui valavala dodonu?

7Mo nanuma mada, se ko cei e rusa ni sa tawa cala? se muduki laivi maivei na daucaka dodonu?

8E vakaoqo ga na ka kaʼu sa dauraica, o ira era sa daucuki e na caka ca, ka kaburaka nai valavala ca, era sa tamusuka ga na ka ko ya.

9Ni sa ceguvi ira na Kalou era sa rusa, ia e na cegu ni ucuna era sa oti laivi.

10Sa mudu mai na tagi ni laioni, kei na domo ni laioni veikata, a sa vorolaki na batidra na luve ni laioni.

11Sa mate na laioni qase ni sa sega na ka e cova, a ra sa dui vakasesei na luve ni laioni tinatina.

12Ia sa tukuni lo mai vei au e dua na ka, a sa rogoca na daligaqu e dua na tikina lailai.

13Niʼu a vakanananu tiko ki na raivotu ni bogi, e na gauna sa dau-biti ira na tamata na moce lutu,

14sa tauvi au mai na rere, kei na sautaninini, a sa yavavala kina na suiqu kecega.

15Sa qai lako voli e mataqu e dua na yalo; sa tu dodonu na vutika ni yagoqu:

16sa wavu tu mai, ia kaʼu sa sega ni kunea rawa na kenai rairai: sa tu e mataqu e dua na raivotu; sa tu lo ga, au sa qai rogoca e dua na domo, sa kaya,

17Me dodonu beka na tamata malumalumu, ka cala na Kalou? me savasava beka na tamata, ka tawa savasava ko Koya ka Buli koya?

18raica, sa sega ni vakadinati ira na nonai talatala; a sa vakacalai ira na nona agi-lose:

19ena qai vakaevei ko ira sa tiko e na vale qele, a nodra yavu na kuvu-ni-soso, era sa butuqaqi e na mata ni sara-sara?

20era sa vurumemei tu mai na mataka ka yaco ki na yakavi: era sa yali laivi tu ga ka sega e nanuma kina:

21e dautakali vei ira na kedra vinaka, se segai? era sa ciba, ia ka sa sega na nodra vuku.