Ai Vola Kei Jope 3 - AI VOLA TABU（FIJ1864）

Sa vosavakacacataka ko Jope na siga ni nona sucu, 1-10. Sa cavuta na mate me ka vinaka, kei na bula rarawa me ka ca, 11-26.

1A SA oti, sa qai dalaga na gusuna ko Jope, ka vosavakacacataka na nona siga.

2A sa vosa ko Jope, ka kaya,

3Me yali na siga kaʼu a sucu kina, kei na bogi sa tukuni kina, Sa sucu e dua na goneatagane.

4Me butobuto na siga ko ya; me kakua ni nanuma maicake na Kalou, ni e kakua talega ni cila kina na rarama:

5me sa kedrau ga na butobuto kei na yaloyalo ni mate; me kenai taukei ga na o; me ka rerevaki sara ga na kena butobuto.

6Ia na bogi o qori, me taura ga na butobuto loaloa; me kakua ni reki vata kei na veisiga ni yabaki; me kakua ni yaco me wili vata kei na veivula.

7Raica, me tu duadua na bogi o qori, me kakua ni rogo kina na domo ni reki.

8Me ra vosavakacacataka ko ira era sa dauvosavakacacataka na nodra siga, o ira era vakarau tu me tabalaka na nodra tagi.

9Me vakabutobutotaki na kalokalo e na kena yakavi; me namaka na rarama, ia me sega ga; me kakua talega ni kunea na mataka caca,

10e na vuku ni sa sega ni sogota nai sogo ni kete i tinaqu, ka sega ni vunia na rarawa mai na mataqu.

11A cava kaʼu a sega kina ni mate niʼu sa qai sucu? a cava kaʼu a sega kina ni ciba niʼu sa curu mai na kete?

12A cava sa tarovi au kina na duruna? kei na mata-ni-sucuna meʼu sucu?

13Kevaka e segai, au a qai koto vakadua edaidai ka tawa oca, kaʼu a qai moce ga: keitou a qai cegu vata,

14kei ira na tui kei na daubose kei vuravura, o ira era sa cakava me nodra na yasana sa sega ni tawa;

15sei ira na turaga era sa vakakoula, a ra sa vakasinaita na nodra vale e na siliva;

16seʼu tautauvata kei na lutudole, meʼu sa segai; me vaka na gone lalai era sa sega ni kunea na rarama.

17Maikea era sa cegu ni ia na veivakararawataki na tamata ca; a sa cegu maikea ko ira sa oca.

18Era sa vakacegu vata maikea ko ira na bobula; era sa sega ni rogoca nona vosa na dauveivakasaurara-taki.

19Era sa tiko maikea na lalai kei na lelevu; a sa sere nai talatala mai na nona turaga.

20A cava sa soli kina na rarama vei koya sa rarawa, kei na bula vei koya sa gaga na yalona;

21o ira era sa namaka na mate, a sa sega ga; a ra sa gu vakalevu kina ka vakalailai ki nai yau sa vuni tu;

22era sa reki vakalevu, ka ladelade, ni ra sa kunea nai bulululu?

23A cava sa soli kina na rarama vua na tamata sa tabogo na nona sala, o koya sa vakalatia na Kalou?

24Ni sa liu mai na noqu vutugu a sa muri na noqu kana, a sa sova yani na noqu tagi me vaka na wai.

25Ni sa yacovi au na ka kaʼu a domobula kina, kei na ka kaʼu a rerevaka sa yaco mai vei au.

26Au a sega ni tiko vakacegu, se tiko wale, se tiko vakailoa; a sa yaco ga mai na ka rarawa.