Ai Vola Kei Jope 2 - AI VOLA TABU（FIJ1864）

Sa yacovi Jope e dua na mate ca, 1-8. A watina sa vosa vakatani vua, a sa vunauca ko Jope, 9, 10. Sa lako mai ko iratou na wekana e lewe tolu me vakacegui koya, 11-13.

1A SA dua na siga era sa lako mai kina na luve ni Kalou me vakatakilai ira e na mata i Jiova, a sa lako mai kei ira ko Setani talega me vakatakilai koya e na mata i Jiova.

2A sa kaya ko Jiova vei Setani, O sa lako maivei? A sa vosa vei Jiova ko Setani, ka kaya, Mai na veilakoyaki e vuravura, kei na veigadeyaki voli kina.

3A sa kaya vei Setani ko Jiova, O sa sega beka ni vakanananu ki na noqu tamata ko Jope, ni sa sega e tautauvata kaya e vuravura, a tamata yalododonu ka daucaka dodonu, a sa rerevaka na Kalou, ka tawa torova na ca? ia ko sa kitaki au meʼu vakarusai koya walega, a sa taura matua tikoga ko koya na nona yalododonu.

4A sa vosa vei Jiova ko Setani, ka kaya, A kuli mei sau ni kuli, ia na nona ka kecega ena solia na tamata me bula kina.

5Ia mo qai dodoka ga na ligamu, ka tara na suina kei na lewena, ena qai vosavakacacataki iko ki matamu.

6A sa kava vei Setani ko Jiova, Raica, sa soli ki ligamu ko koya; ia mo kakua ga ni vakamatea.

7A sa lako tani ko Setani e na mata i Jiova, ka yaviti Jope e na vidikoso, mai na qeteqete ni yavana ka cavaraka na buradelana.

8A sa taura ko koya nai caca ni bilo me kari koya kina; a sa laʼki tiko ki loma ni dravu.

9Sa qai kaya vua ko na watina, O sa taura matua beka tiko na nomu yalododonu? mo vosavakacacataka na Kalou, mo mate.

10A sa kaya vua ko koya, O iko ko sa vosa me vaka e dua na alewa lialia. E vakaevei le? me da rawata beka na ka vinaka vua na Kalou, me da kakua beka talega ni rawata na ka ca? E na ka kecega o qo sa sega ni cala ko Jope e na tebenigusuna.

11Ia ko iratou na weka i Jope e lewe tolu, ni ratou sa qai rogoca na ka rarawa kecega o qo sa yaco vua, eratou sa dui lako yadua mai na nona yasana: o Elifasi na kai Temani, kei Pilitati na luve i Sua, kei Sofari na kai Neema: ni ratou sa lokuca vata na siga me ratou lako mai kina me tagi vata kaya ka vakalecataka.

12Ia ni ratou sa ta cake e na matadratou ni sa yawa tu, eratou sa sega ni kilai koya, a ratou sa tabalaka na domodratou, ka tagi; a ratou sa dui dresulaka na nonai sulu, ka kaburaka na kuvu-ni-soso ki na uludratou kivaka ki lomalagi.

13A ratou sa tiko sobu kaya e na qele me oti na siga e vitu kei na bogi e vitu, a sa sega e dua sa cavuta vua e dua na vosa: ni ratou sa kunea ni sa levu sara na nona rarawa.