Ai Vola Kei Jope 1 - AI VOLA TABU（FIJ1864）

A WASE I. —Sa yalododonu sara ka vutuniyau ko Jope, 1-3. Sa daumasulaki iratou na luvena, 4, 5. Sa kere ko Setani me vakatovolei koya, 6-12. Sa yali na nonai yau kei na luvena, 13-19. Ni sa tagi, sa vakavinavinaka vua na Kalou, 20-22.

1SA dua na tamata mai na vanua ko Usi, na yacana ko Jope; ia na tamata ko ya sa yalododonu ka daucaka dodonu, a sa rerevaka na Kalou, ka tawa torova na ca.

2A sa sucu vua e vitu na luvena tagane ka tolu na luvena alewa.

3Ia na nonai yau sa vitu na udolu na sipi, ka tolu na udolu na kameli, ka dua na udolu na karavau, ka lima na drau na asa alewa, a sa ka tani na nona lewe ni vale; a sa levu cake kina na tamata ko ya vei ira kecega na lewe ni vanua mai cake.

4A sa lako ko iratou na luvena tagane, ka ia na solevu e nodratou veivale, yadua e nona siga; a ratou sa talaki ka kaciva mai na ganedratou e lewe tolu me mai kana ka gunu vata kei iratou.

5Ia ni sa oti na veisiga ni solevu, sa qai talaki ko Jope ka vakasavasavataki iratou, ka sou e na sabogibogi, ka cabora nai soro kama me vaka na kedratoui wiliwili kecega: ni sa kaya ko Jope, De sai valavala ca ko iratou na luvequ, ka vosavakacaca vua na Kalou e lomadratou. A sa daukitaka vakaoqo ko Jope.

6Ia ka sa dua na siga era sa lako mai kina na luve ni Kalou me vakatakilai ira e na mata i Jiova, a sa lako talega mai kei ira ko Setani.

7A sa kaya ko Jiova vei Setani, O sa lako maivei? A sa vosa vei Jiova ko Setani, ka kaya, Mai na dauveilakoyaki e vuravura, kei na veigade-yaki voli kina.

8A sa kaya ko Jiova vei Setani, O sa sega beka ni vakanananu vua na noqu tamata ko Jope, ni sa sega e tautauvata kaya e vuravura, a tamata yalododonu ka daucaka dodonu, a sa rerevaka na Kalou, ka tawa torova na ca?

9Sa qai vosa vei Jiova ko Setani, ka kaya, Sa tawa yaga li vei Jope na nona rerevaka na Kalou?

10O sa sega beka ni viribaiti koya, kei na nona vale, kei na nona ka kece e na veiyasana kecega? o sa vakalougataka na cakacaka ni ligana, a sa tubu me ka levu na nonai yau e na vanua:

11ia mo dodoka mada na ligamu, ka tara na nona ka kecega, ena qai vosavakacacataki iko ki matamu.

12A sa kaya vei Setani ko Jiova, Raica, sa soli ki ligamu na nona ka kecega; ia mo kakua ga ni dodoka na ligamu vei koya. A sa lako tani ko Setani mai na mata i Jiova.

13A sa dua na siga eratou sa kana kina ka gunu waini ko iratou na luvena tagane kei na luvena alewa e na vale nei tuakadratou na ulumatua:

14a sa lako mai e dua nai talaki vei Jope, ka kaya, Era a cuki were tu e nai sivi yara na karavau, a ra sa kana voleka kina na asa:

15a sa lutuki ira ko ira na kai Sipa, ka kauti ira tani, a ra sa vakamatei ira na cauravou e na bati ni seleiwau; ia koi au ga kaʼu sa dro bula duaduaga me tukuna vei iko.

16Ni sa vosa tiko ko koya, sa lako talega mai e dua tani tale, ka kaya, Sa lutu mai lomalagi na buka waqa ni Kalou, a sa vakacaudrevi ira na sipi, kei ira na cauravou, sa kani ira sara; ia koi au ga kaʼu sa dro bula duaduaga me tukuna vei iko.

17Ni sa vosa tiko ko koya, sa lako talega mai e dua tani tale, ka kava, Era lesia na mataivalu e tolu ko ira na kai Kalitea, ka lutuki ira na kameli, ka kauta tani a ra sa mokuti ira na cauravou e na bati ni seleiwau; ia koi au ga kaʼu sa dro bula duaduaga me tukuna vei iko.

18Ni sa vosa tiko ko koya, sa lako talega mai e dua tani tale, ka kaya, Sa kana ka gunu waini ko iratou na luvemu tagane kei na luvemu alewa mai na vale ni tuakadratou na ulumatua:

19ka, raica, sa yaco mai e dua na cagi levu mai lekutu, a sa roba na tutu ni vale e va, a sa baleti ira na cauravou, a ra sa mate; ia koi au ga kaʼu sa dro bula duaduaga me tukuna vei iko.

20Sa qai tu cake ko Jope, ka dresulaka na nonai sulu, ka tasia na uluna, ka bale ki na soso, ka masu,

21ka kaya, Au a luvawale niʼu a lako mai na kete i tinaqu, au na luvawale talega niʼu sa suka kikea: sa solia ko Jiova, a sa kauta tani ko Jiova; me vakavinavinakataki ga na yaca i Jiova.

22E na ka kecega o qo sa sega ni valavala ca ko Jope, se kaya me cala na Kalou.