Ai Vola Kei Jope 24 - AI VOLA TABU（FIJ1864）

Sa vaka ko koya ni sa tawa saumi na ca kecega e na bula o qo, 1-17. Era sa daucudruvi vakavuni na tamata ca, 18-25.

1NI sa sega ni tabonaki na veigauna vei Koya sa Kaukauwa, a cava era sega kina ni kunea na nona siga ko ira era kilai koya?

2E so na tamata era kisi ra nai yalayala ni vanua; era kovea na qele ni sipi, ka laʼki vakania.

3Era vakaseva tani na nodra asa na luveniyali, era sa saumi ira vakai ira e na nona karavau na alewa dawai.

4Era sa biuti ira tani mai na sala na dravudravua: sa ra vunitaki ira vata vakai ira na dravudravua kei vuravura.

5Raica, me vaka na asa kila mai lekutu, era sa lako ki na nodra cakacaka; ka sou e na sabogibogi me ia na butako: sa rawa mai lekutu na kedra kei na kedra talega na luvedra.

6Era dui tamusuka na kedra mai na were: a ra sa covia na nodra vaini nai valavala ca.

7Era sa cakavi koya na luvawale me moce ka tawa vakaitutuvi, ka sega ni vakai tutuvi e na liliwa:

8era sa suasua e na uca mai na veiulu-ni-vanua, a ra sa mokota na vatu ni sa sega na vanua me ra vakaruru kina.

9A ra sa kaliraka na luveniyali mai na sucu, a ra sa kauta tani nonai sulu na dravudravua mei sau ni ka;

10era kitaka me lako luvawale ka sega ni vakaisulu, a ra sa kauta tani nai vau sila maivei ira sa viakana;

11o ira era sa cakava na waiwai e loma ni nodra bai, ka butubutu e nai keli waini, ka ra sa viagunu ga.

12Sa ra vutugu na tamata mai loma ni koro, a sa qoqolou na yalo i koya sa vuetaki: ia sa sega ni vakacalai ira na Kalou.

13O ira o qo era sa talaidredre ki na rarama; era sega ni kila na kena sala, se tiko e na kenai lakolako.

14Sa yadra mai na daulaba ni sa kida na mataka, a sa vakamatea na kaisi kei na dravudravua, a sa yaco me daubutako e na bogi.

15A mata i koya talega na dauyalewa sa waraka na yakavi, ka kaya, Sa na sega ni kunei au e dua na tamata: a sa puloutaka na matana.

16Ni sa butobuto era keliru-kuta na vale, era sa digitaka oti e na siga: era sega ni kila na rarama.

17Ni sa tautauvata na sabogibogi kei na yaloyalo ni mate vei ira; ke sa kilai ira e dua, ke sa vaka na yaloyalo ni mate dina na nodra rere.

18Sa vaka na ka mamada ko koya e na dela ni wai; sa vakarusai na nodrai votavota e vanua: sa sega ni goleva ko koya na sala ki na veivainivaini.

19Sa kaliraka na wai ni uca-vulavula na siga kei na katakata: sa ia vakakina nai bulubulu vei ira era sai valavala ca.

20Ena guilecavi koya ko tinana; ena daumaki koya na baca; ena tawa nanumi tale; ia ena raramusumusu na caka ca me vaka na kau.

21Sa vakacacani koya sa yava ka tawa vakasucu: a sa sega ni caka vinaka vua na alewa dawai.

22Sa yarataki ira talega na qaqa e na nona kaukauwa: sa tu cake ko koya, a sa sega e nanuma me bula.

23Sa soli vua me tiko vakacegu, a sa vakararavi kina; ia sa vakaraica na nodra sala na mata i Koya.

24Era sa vakalevulevui me bogi vica ga, era sa qai yali ka vakamalumalumutaki; era sa kauti tani me vakataki ira na tamata kecega; era sa covi mo vaka na sola ni sila.

25Ia kevaka e sega ni vakakina, o cei me vakatakila na noqu lasu, ka vakatawayagataka na noqu vosa?