Ai Vola Kei Esiteri 8 - AI VOLA TABU（FIJ1864）

Sa lesi ko Moritikei me turaga; a sa vaka ko Easiverosi me dua tale na vunau, era sa reki kina ko ira na Jiu.

1E NA siga ko ya sa solia ko Easiverosi na tui na vale i Amani na nodra meca na Jiu vei Esiteri na ranadi. A sa lako mai ki na mata ni tui ko Moritikei; ni sa tukuna ko Esiteri ni sa wekana ko koya.

2A sa cavuta mai na nona mama sa kauta tani vei Amani, ka solia vei Moritikei. A sa lesi Moritikei ko Esiteri me turaga ni vale i Amani.

3A SA vosa tale ko Esiteri e matana na tui, ka bale sobu ki na yavana, ka vakamasuta ni sa vakawai na matana, me vakaseavutaka na ca i Amani na luve i Ekaki, kei na nonai naki sa nakita ko koya me vakayacora vei ira na Jiu.

4A sa dodoka nai titoko koula ko na tui vei Esiteri. A sa tu cake ko Esiteri, a sa tu e matana na tui,

5a sa kaya, Kevaka sa vinakata ko na tui, ia kevaka kaʼu sa kunea na loloma e matamu, ka sa dodonu na ka o qo e na mata ni tui, a sa vinakati au na matamu, me volai nai vola me vakatanitaka na veivota sa cakava ko Amani, na luve i Mitaca, na luve i Ekaki, a ya ka vola ko koya mo vakarusai ira na Jiu e na nona veiqali kecega na tui:

6niʼu na vosota rawa vakaevei me raica na ca ena yacovi ira na kai noqu? se meʼu vosota vakaevei me raica na nodra rusa na wekaqu?

7Sa qai kaya na tui ko Easiverosi vei Esiteri na ranadi, kei Moritikei na Jiu, Raica, kaʼu sa solia vei Esiteri na vale i Amani, a sa vakalilici ko koya e na kau, e na vuku ni sa dodoka na ligana vei ira na Jiu:

8drau volavola talega e na vukudra na Jiu, e na yaca ni tui, me vaka na ka drau sa vinakata, ka mo tabai na kena drega e na mama ni tui: ni sa tabu ni vakatanitaka nai vola sa volai e na yaca ni tui, ka tabai na kena drega e na mama ni tui.

9Era sa qai kacivi ko ira na nona vu-ni-vola na tui e na siga ko ya, e nai katolu ni vula, a ya na vula ko Sivani, e na kenai karuasagavulu ka tolu ni kena siga; a sa volai me vaka na ka kecega ka rotaka ko Moritikei, vei ira na Jiu, vei ira talega na turaga sa liu, kei ira na matanivanua, kei ira na turaga ni veiqali, sa vakatekivu mai Idia ka yala ki Kusi, e dua na drau ka ruasagavulu ka vitu na qali, ki na qali yadua me vaka na nodra mata ni vola, kei na mataqali yadua me vaka na nodra vosa, vei ira talega na Jiu e na nodra mata ni vola, ka vaka na nodra vosa.

10A sa volavola ko koya e na yaca i Easiverosi na tui, ka tabaka e na mama ni tui, ka vakauta na veivota vei ira era daucicivaka nai vola, kei ira sa vodoka na ose, kei ira sa vodoka na mule, kei na kameli, kei na kameli gone:

11ia e nai vola ko ya sa solia ko na tui vei ira na Jiu era tiko e na koro kecega me ra soqoni vata, ka veitu-taki me ra bula, me ra ia na veivakacacani, kei na veivakamatei, kei na veivakarusai, kei ira na tamata kaukauwa, kei ira na qali sa via kitaki ira vakaca, ko ira na lalai kei ira na alewa, a me tokitaka na nodra yau,

12e na siga e dua, e na qali kecega i Easiverosi na tui, e nai katinikatolu ni siga ni kenai katinikarua ni vula, o qori na vula ko Etari.

13Sa tukuni vei ira na tamata kecega na vunau sa volai me kauti ki na veiqali kecega, a me ra vakarau ko ira na Jiu ki na siga ko ya, me ra saumi ira vei ira na nodra meca.

14A ra sa lako yani na tamata daucici vola era vodoka na mule kei na kameli, ni ra sa vakariri taki ka cikevi e na vuku ni sau ni tui. A sa tukuni yani na sau mai Susani na koro vakaturaga.

15A sa lako yani mai na mata ni tui ko Moritikei, ka sa vakaisulu e nai sulu vakatui e karakarawa ka vulavula, kei nai sala koula levu, kei nai sulu matailalai ka karakarawa: a sa rereki ka mamarau na koro ko Susani.

16Sa nodra na Jiu na rarama, kei na mamarau, kei na rereki, kei na vakarokoroko.

17Sa rereki ka mamarau ko ira na Jiu, a sa nodra na solevu kei na siga vinaka, e na qali kecega, kei na koro kecega, sa yaco kina na sau ni tui kei na nonai lesilesi. A ra sa yaco me Jiu e lewe vuqa vei ira na lewe ni vanua; ni sa tauvi ira na rere e na vukudra na Jiu.