Ai Vola Kei Esiteri 7 - AI VOLA TABU（FIJ1864）

Sa bula ko Esiteri kei ira na kai nona; a sa vakalilici ko Amani.

1A RAU sa lako na tui kei Amani me ia na solevu kei Esiteri na ranadi.

2A sa vosa tale na tui vei Esiteri, e nai karua ni siga, e na gunu waini, A cava na ka ko sa masuta, i Esiteri na ranadi? ena soli ga vei iko: ka cava na ka ko sa kerea? ena vakayacori ga, ka yaco ki na wase rua ni matanitu.

3Sa qai vosa ko Esiteri na ranadi, ka kaya, Kevaka ko sa vinakati au, ko iko na tui, ia kevaka sa vinakata ko na tui, meʼu bula ga niʼu sa masuta, kei ira na kai noqu niʼu sa kerea:

4ni keimami sa volitaki, koi au kei ira na kai noqu, me vakacacani, me vakamatei, ka me rusa sara. Ia kevaka keimami sa volitaki walega me tagane bobula, ka alewa bobula, au sa galu ga, ia ka sa dredre vua na meca me kakua ni ca kina na tui.

5Sa qai vosa ko Easiverosi na tui, ka kaya vei Esiteri na ranadi, O cei ko koya? ka sa tiko evei ko koya sa doudou na lomana me kitaka vakaoqo?

6A sa kaya ko Esiteri, A tamata ca kei na meca ko ya ko Amani na yaloca o qo. Sa qai rere ko Amani e na matadrau na tui kei na ranadi.

7A sa tu cake na tui mai na gunu waini e nona cudru, ka lako ki ni were mai na vale vakatui: a sa tu cake ko Amani me kerea na nona bula vei Esiteri na ranadi; ni sa kunea ni sa nanuma ca vua ko na tui.

8A sa lesu mai ko na tui mai na were ni vale vakatui ki na yasana ni gunu waini, ka sa bale no ko Amani ki nai mocemoce sa tiko kina ko Esiteri. A sa kaya na tui, Ena turisautaka tale na ranadi beka e mataqu e na vale? Ni sa lako na vosa mai na gusu ni tui, era sa tabonaka na mata i Amani.

9A sa kaya e na mata ni tui ko Aripona, e dua vei iratou na nona mata na tui, Raica talega, sa tu e na vale i Amani na kau sa dua na drau na caga na kena cecere, a ya sa cakava ko Amani me kei Moritikei, o koya ka tukutuku vinaka e na vukuna na tui. A sa kaya na tui, Vakalilici koya kina.

10A ra sa vakalilici Amani e na kau sa cakava ko koya me kei Moritikei. Sa qai ruru na cudru ni tui.