Ai Vola Kei Esiteri 6 - AI VOLA TABU（FIJ1864）

Sa vakarokorokotaki ko Moritikei.

1SA sega ni moce rawa ko na tui e na bogi ko ya, a sa vosa me kau mai nai vola ni tukutuku ni veika sa caka, a sa wiliki e matana na tui.

2A sa kune ni sa volai kina, ni sa tukuni Pikicani kei Teresi ko Moritikei, e rua vei iratou na nona mata na tui, erau a dauvakatawai na katuba, oi rau ka vakasaqara me vakamatea na tui ko Easiverosi.

3A sa kaya na tui, A vakarokoroko cava kei na ka vakaturaga sa caka vei Moritikei e na vuku ni ka o qo? Sa qai kaya ko iratou na tamata eratou sa dauqarava na tui, Sa sega na ka e caka vua.

4A sa kaya na tui, O cei sa tiko e na rara? Ia sa qai curu mai ko Amani ki na rara ni vale ni tui, a ya na rara etaudaku, me vosa ki na tui me vakalilici ko Moritikei e na kau sa vakarautaka vua ko koya.

5A sa kaya vua ko ira era sa dauqarava na tui, Raica, ko Amani sa tu e na rara. A sa kaya na tui, Me curu mai ko koya.

6A sa curu mai ko Amani. A sa kaya na tui vei koya, A cava na ka me sa caka vua na tamata sa vinakata ko na tui me vakarokorokotaki? A sa nanuma e lomana ko Amani, Sa vinakati cei li ko na tui me vakarokorokotaki, koi au ga?

7A sa kaya vua na tui ko Amani, Vei koya sa vinakata ko na tui me vakarokorokotaki,

8me kau mai kina nai sulu sa dausuluma ko na tui, kei na ose sa dauvodoka ko na tui, kei nai sala vakatui sa toka e uluna:

9ia me soli nai sulu o qo kei na ose vua e dua sa cecere sara vei ira na nona tamata vakaturaga na tui, me ra vakaisulutaka kina na tamata sa vinakata ko na tui me vakarokorokotaki, ka kauti koya voli e na salatu ni koro ni sa vodo tiko e na ose, ka kailavaka lako e matana, Ena caka vakaoqo vua na tamata sa vinakata ko na tui me vakarokorokotaki.

10Sa qai kaya na tui vei Amani, Mo kusarawa, mo kauta nai sulu kei na ose, me vaka na nomu vosa, ka kitaka vakakina vei Moritikei na Jiu, o koya sa dautiko mai na matamata-ni-koro ni tui: me kakua ni yali e dua na ka e na ka kece ko sa cavuta.

11Sa qai kauta nai sulu kei na ose ko Amani, ka vakaisulutaki Moritikei, ka kauti koya voli e na salatu ni koro, ni sa vodo lako e na ose, a sa kailavaka e matana, Ena caka vakaoqo vua na tamata sa, vinakata ko na tui me vakarokorokotaki.

12A sa lako tale mai ki na matamata-ni-koro ko Moritikei. A sa lako vakusakusa ki nona vale ko Amani, ka tagi lako, a sa solei tutuvi.

13A sa tukuna ko Amani vei Seresi na watina kei ira kecega na wekana na ka kece sa yaco vua. Era sa qai kaya vua ko iratou na nona tamata vuku kei Seresi na watina, Kevaka e kawa ni Jiu ko Moritikei, ko sa qai vakatekivu me bale e matana, o na sega ni gumatua vua, o na bale vakaidina ga e matana.

14IA ni ratou sa veivosaki tiko kaya, sa lako mai ko ira na nona mata na tui, a ra sa mai vakariritaki Amani yani ki na magiti sa vakarautaka ko Esiteri.