Ai Vola Kei Esiteri 5 - AI VOLA TABU（FIJ1864）

Sa lako ko na tui kei Amani ki na magiti i Esiteri, 1-8. A sa rarawa ga ko Amani ni sa tawa dokai koya ko Moritikei, 9-14.

1IA e na kenai katolu ni siga sa vakaisulu vakaranadi ko Esiteri, ka laʼki tu e na rara eloma ni nona vale na tui, sa donuya na nona vale na tui: a sa tiko na tui e nonai tikotiko vakatui e na vale ni tui, sa donuya na matamata-ni-koro ni vale.

2Ia ka sa vakakina ni sa kunea ko na tui ni sa tu ko Esiteri na ranadi e na rara, sa lomani koya: a sa dodoka ko na tui vei Esiteri nai titoko koula sa lukuta. A sa toro yani ko Esiteri, ka tara na mua ni titoko.

3A sa kaya na tui vei koya, A cava ko sa vinakata, Esiteri na ranadi? ka cava na ka ko sa kerea? ena soli ga vei iko, kevaka kaʼu na wasea rua kina na noqu matanitu.

4A sa vosa ko Esiteri, Kevaka sa vinakata ko na tui, me mai lakani e na siga o qo ko na tui kei Amani ki na magiti kaʼu sa cokonaka vei rau.

5A sa kaya na tui, Me vakusarawataki ko Amani, me cakava ko koya na ka sa kaya ko Esiteri. A rau a lako yani na tui kei Amani ki na magiti sa vakarautaka ko Esiteri.

6A sa kaya na tui vei Esiteri ni sa ia na gunu waini, A cava na ka ko sa masuta? ena soli ga vei iko: ka cava na ka ko sa kerea? ena vakayacori ga ki na wase rua ni matanitu.

7A sa vosa ko Esiteri, ka kaya, A noqu masumasu kei na noqu kerekere:

8Kevaka sa vinakati au ko na tui, a sa vinakata ko na tui me solia na ka kaʼu sa masuta, ka vakayacora na ka kaʼu sa kerea, me drau lako mai ko na tui kei Amani ki na magiti kaʼu na cokonaka vei kemudrau, au na qai kitaka e na sabogibogi me vaka sa kaya ko na tui.

9NI sa qai lako yani ko Amani e na siga ko ya, sa marau ka rereki na lomana: ia ni sa kunei Moritikei ko Amani e na matamata-ni-koro ni tui, a sa sega ni vakarokorokotaki koya ko koya, sa qai levaci sara ko koya vei Moritikei.

10A sa kinoca ga ko Amani: ia ni sa yaco ki nona vale, sa talaki me kacivi ira na wekana, kei Seresi na watina.

11A sa tukuna vei ira ko Amani nai ukuuku ni nona yau, kei na kena lewe vuqa na luvena, kei na ka kecega sa vakalevui koya kina ko na tui, kei na nona laveti koya me uasivi vei ira na turaga kei ira na nona tamata na tui.

12Sa kaya talega ko Amani, O Esiteri talega na ranadi, sa sega ni kaya me lako kaya na tui e dua tani tale ki na magiti sa cakava ko koya, koi au duaduaga; a sa kaya meʼu lako kaya na tui vei koya e na sabogibogi talega.

13Ia sa ka wale na ka kecega o qo vei au, niʼu sa raici Moritikei na Jiu ni sa tiko e na matamata-ni-koro ni tui.

14Sa qai kaya vei koya ko Seresi na watina kei ira kece na wekana, Me cakavi na kau me dua na drau na caga na kena cecere, ia e na sabogibogi mo vosa vua na tui me vakalilici kina ko Moritikei: mo qai marau ni ko sa lako kaya na tui ki na magiti. A sa vinakata ko Amani na ka o qo, a sa kaya me kitaki na kau.