1IA e nai katinikarua ni vula, a ya na vula ko Etari, e nai katinikatolu ni siga ni vula ko ya, ni sa voleka ni vakayacori na sau ni tui kei na nonai lesilesi, e na siga era a nakita me rawati ira na Jiu ko ira na nodra meca, (a sa qai vukici, a ra sa tanaki era cati ira ko ira na Jiu;)
2era sa soqoni vata ko ira na Jiu e na nodra veikoro e na qali kecega i Easiverosi na tui, me vakamatei ira era via vakacacani ira: a sa sega na tamata sa gumatua vei ira, ni sa tauvi ira kecega na tamata na rere e na vukudra.
3Ia ko ira kecega era lewa na veiqali, kei ira na turaga sa liu, kei ira na mata ni veiqali, kei ira na tamata ni tui, era sa vukei ira na Jiu; ni sa lutuki ira na rere e na vuku i Moritikei:
4ni sa yaco ko Moritikei e na vale ni tui, a sa kuruvaki na kenai rogo e na qali kecega: ni sa tubu me levu cake tikoga na tamata o qori ko Moritikei.
5A ra sa mokuti ira kece na nodra meca ko ira na Jiu e na veimoku e nai seleiwau, kei na veivakamatei, kei na veivakarusai, ka veitalia e na ka era cakava vei ira era sa cati ira.
6A sa vakamatea ka vakarusa ko ira na Jiu, e lima na drau na tamata mai Susani na koro vakaturaga.
7A ra sa vakamatei Parisadaca, kei Talifoni, kei Asipaca,
8kei Poraca, kei Etaliya, kei Eritaca,
9kei Parimasita, kei Erisai, kei Eritai, kei Yasa ca,
10era lewe tini na tagane na luve i Amani na luve i Mitaca, na nodra meca na Jiu; a ra sa sega ni tara nai toki.
11E na siga ko ya sa kauti vua na tui na kedrai wiliwili era sa vakamatei mai Susani na koro vakaturaga.
12A sa kaya na tui vei Esiteri na ranadi, Sa vakamatea ka vakarusa ko ira na Jiu e lima na drau na tamata e Susani na koro vakaturaga, kei iratou na luve i Amani eratou lewe tini; a cava beka era sa kitaka e na kedra vo na veiqali ni tui? ia ka cava ko sa masuta? ena soli ga vei iko: se cava tale na ka ko sa kerea? ena vakayacori ga.
13A sa kaya ko Esiteri, Kevaka sa vinakata ko na tui, me soli ga vei ira na Jiu era sa tiko e Susani me ra cakava e na mataka talega na ka sa lesi edaidai, ia me vakalilici e na kau na luve i Amani eratou lewe tini.
14A sa vosa na tui me kitaki: a sa soli na sau mai Susani; a ra sa vakalilici iratou na luve i Amani eratou lewe tini.
15A ra sa soqoni vata ko ira na Jiu mai Susani e nai katinikava ni siga talega ni vula ko Etari, ka vakamatea na tamata e lewe tolu na drau mai Susani; a ra sa sega ni tara nai toki.
16Ia ko ira na Jiu sa vo e na veiqali ni tui, era sa soqoni vata, ka veitutaki me ra bula, ka vakacegu e na vuku ni nodra meca, ka vakamatea o lewe vitu na oba ka lima na udolu, ka ra sa sega ni tara nai toki,
17e nai katinikatolu ni siga ni vula ko Etari; ia e nai katinikava ni siga ni vula ko ya era sa vakacegu, ka lokuca me siga ni solevu kei na marau:
18ia ko ira na Jiu mai Susani era sa soqoni vata e nai katinikatolu ni siga, kei na kenai katinikava; ia na kenai katinikalima era sa vakacegu, ka lokuca me siga ni solevu kei na marau.
19Ia ko ira na Jiu mai na Veikoro lalai, era sa tiko e na Veikoro sa tawa vakabai, era sa lokuca nai katinikava ni siga ni vula ko Etari me siga ni mamarau kei na solevu, kei na siga vinaka, kei na veisoliyaka na ka.
20A SA vola na veika o qo ko Moritikei, a sa vakauta na vei vola kivei ira kece na Jiu e na qali kecega ni tui ko Easiverosi, o ira era voleka kei ira era yawa,
21me vakataudeitaka vei ira, me ra vakabauta nai katinikava ni siga ni vula ko Etari, kei na kenai katinikalima talega, e na veiyabaki,
22me siga era vakacegu kina ko ira na Jiu, kei na vula sa vukici kina na nodra rarawa me rereki, kei na nodra tagi me siga vinaka: me ra lokuca me siga ni solevu kei na rereki, kei na veisoliyaka na ka, kei na soli ka-ni-loloma vei irana dravudravua.
23A sa bole ko ira na Jiu me ra cakava na ka era sa vakatekivuna, ka me vaka sa vola vei ira ko Moritikei;
24e na vuku ni sa bosea na ca vei ira na Jiu, me vakarusai ira, ko Amani na luve i Mitaca, na luve i Ekaki, a nodra meca na Jiu, a sa ia na Turi, o qori na veidigidigi, me vakaoti ira, ka vakarusai ira;
25ia ni sa lako mai ko Esiteri ki na mata ni tui, sa vakarota ko koya e nai vola, me saumaki ki na uluna na vere ca sa vere kina vei ira na Jiu, a me ratou vakalilici e na kau ko koya kei iratou na luvena tagane.
26O koya sa vakatokai kina na siga o qori na Purimi, mo muria na yaca ni Puri. O koya e na vuku ni vosa kecega ni vola o qo, kei na ka era sa kunea e nai valavala o qo, a ya sa yacovi ira,
27era sa lesia ko ira na Jiu, ka bolea e na vukudra, kei na vukudra na nodra kawa, kei ira kecega era sa laʼki kabiti ira, me kakua kina ni mudu, ka me ra vakabauta ga na siga e rua o qo me vaka na vosa sa volai kina; kei na kenai loku-loku e na yabaki kecega;
28ia me daunanumi ka vakabauti na siga e rua o qo e nai tabayatamata kecega, vei ira na mataqali kecega, e na qali kece, kei na koro kece; ka me kakua ni mudu na siga ni Purimi o qo vei ira na Jiu, se oti na kenai vakananumi vei ira na nodra kawa.
29A sa volavola vakaturaga sara ko Esiteri na ranadi, na luve i Epieyeli, kei Moritikei na Jiu, me vakataudeitaka nai karua ni vola o qo e na vuku ni Purimi.
30A sa vakauta na veivola vei ira kecega na Jiu, ki na qali e dua na drau ka ruasagavulu ka vitu e na matanitu i Easiverosi, a sa kauti vata kei na vosa ni vakacegu kei na dina,
31me vakataudeitaka na siga e rua ni Purimi me ia kina e na kena gauna, me vaka sa vakadreta vei ira ko Moritikei na Jiu kei Esiteri na ranadi, me vaka talega na nodraui lesilesi e na vukudra, ka e na vuku ni nodra kawa, io e na vuku ni lolo kei na tagi.
32A sa vakataudeitaka na ka o qo e na vuku ni Purimi na leba i Esiteri; a sa volai e nai vola.
Who We AreWhat We EelieveWhat We Do
2025 by iamachristian.org,Inc All rights reserved.
