Ai Vola I Niemiya 12 - AI VOLA TABU（FIJ1864）

O ira na bete kei ira na Levi era sa lako mai Papiloni, 1-26. Sa vakatabui na bai, 27-43. E so sa lesi ki na cakacaka e na vale ni soro, 44-47.

1IA ko ira o qo na bete kei ira na Levi era a lako cake kei Sirupapeli na luve i Sialitieli, kei Josua: o Siraya, o Yirimia, o Esira,

2o Amariya, o Maluki, o Atusi,

3o Sikaniya, o Riumi, o Meremoci,

4o Ito, o Kinico, o Epiya,

5o Mayamini, o Meatiya, o Pilika,

6o Simaya, kei Yoyaripi, o Yitaya,

7o Salu, o Amoki, o Ilikeya, o Yitaya. O ira o qo sa liu vei ira na bete, kei ira na wekadra, e na gauna i Josua.

8Ia ko ira na Levi: o Josua, o Pinui, o Katimieli, o Serepiya, o Juta, o Mataniya, o koya sa lewa na vakavinavinaka, o koya kei ira na wekana.

9Kei Pakipukiya kei Uni, na wekadra, erau sa donui ira e na vale ni vakatawa.

10A sa sucu vei Josua ko Yoyakimi, a sa sucu vei Yoyakimi ko Iliyasipi, a sa sucu vei Iliyasipi ko Yoyata,

11a sa sucu vei Yoyata ko Jonacani, a sa sucu vei Jonacani ko Yatua.

12Ia ko ira na bete e na gauna i Yoyakimi era sa turaga vei ira na qase: maivei Siraya, ko Miraya; maivei Yirimia, ko Eneniya:

13maivei Esira, ko Misulami; maivei Emariya, ko Yioanani;

14maivei Miliku, ko Jonacani; maivei Sipaniya, ko Josefa;

15maivei Arimi, ko Atina; maivei Miremoci, ko Elikai;

16maivei Ito, ko Sikariya; maivei Kiniconi, ko Misulami;

17maivei Epiya, ko Sikiri; maivei Miniyamini na kai Moatiya, ko Pilitei:

18maivei Pilika, ko Samua; maivei Simaya, ko Yionacani;

19ia maivei Yoyaripi, ko Matinei; maivei Yitaya, ko Usi;

20maivei Salei, ko Kalei; maivei Amoki, ko Iperi;

21maivei Ilikiya, ko Esapiya; maivei Yitaya, ko Necaneli.

22O ira na Levi e na gauna i Iliyasipi, ko Yoyata, kei Yoanani, kei Yatua, era sa volai me liu vei ira na qase: kei ira talega na bete, ka yacova na lewa i Tario na kai Perisia.

23O iratou na luve i Levi, era sa liu vei ira na qase, era sa volai e nai vola ni veika sa caka, ka yacova na gauna i Yaonani na luve i Iliyasipi.

24Kei iratou sa liu vei ira na Levi: o Esapiya, ko Serepiya, kei Josua na luve i Katimieli, kei na wekadra era sa donui ira, me dauia na vakavinavinaka kei na vakamolimoli, me vaka nai vakaro i Tavita na tamata ni Kalou, sa veidonui na vale ni vakatawa.

25O Mataniya, kei Pakipukiya, ko Opatiya, ko Misulami, ko Talimoni, ko Akupi, erai vakatawa, era sa vakatawa tiko e na vale ni vakatawa mai nai lago ni matamata-ni-koro.

26O iratou o qo e na gauna i Yoyakimi na luve i Josua, na luve i Yosataka, kei na gauna i Niemiya na turaga, kei Esira na bete, na vu-ni-vola.

27IA ni sa vakatabui na bai ni Jerusalemi era sa vakasaqarai ira na Levi mai na nodra yasana kecega, me kauti ira ki Jerusalemi, me kitaka nai cabocabo e na marau, e na vakamolimoli, kei na meke, e na vei-sibali, kei na veisaliteri, kei na veiapi.

28A ra sa soqoni vata ko ira na luvedra na dau-ni-meke, mai na vanua buca sa vakavolivoliti Jerusalemi, kei na nodra veikoro lalai na kai Nitofa;

29mai na vale talega ni Kilikali, kei na vanua teitei ni Kepa kei Asimaveci; ni ra sa tara ko ira na dau-ni-meke na nodra veikoro lalai me vakavolivoliti Jerusalemi.

30A sa vakasavasavataki ira ko ira na bete kei ira na Levi, ka vakasavasavataki ira na tamata, kei na veimatamata-ni-koro, kei na bai.

31Au a qai kauti ira cake na turaga ni Juta ki na dela ni bai, ka lesia e rua nai vavakoso lelevu me ia na vakavinavinaka, e dua sa lako ki na liga i matau e na dela ni bai kivaka ki na matamata-ni-koro ni benu:

32a sa muri ira ko Osaya, ka dua na wase ni turaga ni Juta,

33kei Asariya, ko Esira, kei Misulami,

34ko Juta, kei Pinijamini, kei Simaya, kei Yirimia,

35ka so vei ira na luvedra na bete era vakadavui: o Sikariya na luve i Jonacani, na luve i Simaya, na luve i Mataniya, na luve i Mikaya, na luve i Sakuri, na luve i Asafi:

36kei iratou na wekana: o Simaya, kei Asareli, ko Milelei, ko Kilelei, ko Maei, ko Necaneli, kei Juta, ko Enani, era kauta na ka domo vinaka i Tavita na tamata ni Kalou, kei Esira na vu-ni-vola sa liutaki ira.

37Ia mai na matamata-ni-koro ni mata-ni-wai, a ya sa donui ira, era sa cabeta nai cabecabe ki na koro i Tavita, mai nai cabecabe ni bai, a ya sa toka ecake ka toka era na vale i Tavita, ka yacova na matamata-ni-koro ni wai kivaka ki na tu e cake.

38Ia nai vavakoso kadua sa ia na vakavinavinaka era lako ka donui ira, ia kaʼu a muri ira, oi au vata kei na dua na wase ni tamata e na dela ni bai, mai na yasana sa koto yani mai na vale-cecere ni veilovo, ka yacova na bai rabailevu;

39mai na bai talega e na dela ni matamata-ni-koro ki Ifireimi, kei na matamata-ni-koro makawa, kei na matamata-ni-koro ni ika, kei na vale-cecere i Enaneli, kei na vale-cecere i Mea, ka yacova na matamata-ni-koro ni sipi: a ra sa tu vakadua e na matamata-ni-koro ni vale ni veivesu.

40A ra sa tu nai vavakoso ruarua era sa vakavinavinaka e na vale ni Kalou, oi au talega, ia ka dua vei rau nai lawalawa vakaturaga sa tu vata kei au:

41kei ira na bete: o Eliyakimi, o Meesiya, o Miniyamini, o Mikaya, o Elioenei, o Sikariya, kei Eneniya, a ra sa vakadavui;

42kei Meeseya, kei Simaya, kei Eliasari, kei Usi, kei Yioanani, kei Malikiya, kei Elama, kei Eseri. A sa meke vakadomoilevu ko ira na dau-ni-meke, a sa nodra turaga ko Isiraya.

43Era sa cabora talega nai soro levu e so e na siga ko ya, ka marau: ni sa vakamarautaki ira na Kalou e na marau levu: sa rereki talega ko ira na watidra kei ira na gone: a sa rogo vakayawa na rereki ni Jerusalemi.

44IA e na gauna ko ya sa lesi e so me vakaraica na vata, me yau kina nai madrali, kei nai sevu, kei nai katini ni ka, me kumuni vata kina nai votavota sa tukuna na vunau me nodra na bete kei ira na Levi, io mai na veiwere kei na veikoro: ni sa marau ko ira na Juta e na vukudra na bete kei ira na Levi era sa wawa tiko.

45Ia ko ira na dau-ni-meke, kei ira nai vakatawa ni katuba, era sa vakabauta na vunau sa lesia vei ira ko na Kalou, kei na vunau e na vuku ni veivakasavasavataki, me vaka na vosa i Tavita, kei Solomoni na luvena.

46Ni ka tiko eliu e na gauna i Tavita kei Asafi, e so sa liu vei ira na dau-ni-meke, kei na meke ni vakavinavinaka kei na vakamolimoli vua na Kalou.

47Ia ko ira kecega na Isireli, e na gauna i Sirupapeli, kei na gauna i Niemiya, era vota na nodrai votavota na dau-ni-meke, kei ira nai vakatawa ni katuba, sa votai e na veisiga kecega: a ra sa vakatabuya na ka e so me nodra na Levi; a ra sa vakatabuya na Levi me nodra na luve i Eroni.