1A SA dua na tagi levu vei ira na tamata kei na watidra e na vuku ni wekadra na Jiu.
2Ni sa so era kaya, Keitou sa lewe vuqa koi keitou, ko ira na luve i keitou tagane, kei ira na luve i keitou alewa: o koya keitou sa taura kina na sila, me keitou kana, ka bula.
3Sa kaya talega e so, Keitou sa volitaka na neitou vanua, na veivainivaini, kei na veivale, me keitou volia kina na sila, e na vuku ni dausiga.
4Sa kaya talega e so, Keitou sa sarava nai lavo ki na nonai vakacavacava na tui, a sa soli e na vuku ni neitou vanua kei na neitou veivainivaini.
5Ia na lewe i keitou, sa vaka na lewedra na weka i keitou, na luve i keitou sa vaka na luvedra: ka, raica, keitou sa volitaki ira na luve i keitou tagane kei na luve i keitou alewa me ra bobula, a sa so vei ira na luve i keitou alewa era sa bobula tu: ia keitou sa sega ni voli ira tale rawa mai; ni sa nodra na tamata tani na neitou vanua kei na neitou veivainivaini.
6Ia kaʼu a cudru vakalevu niʼu a sa rogoca na nodra tagi kei na vosa o qo.
7Au a qai bose vakai au, ka vunauci ira na turaga, kei ira era lewa tiko, ka kaya vei ira, Dou sa taroga nai voli ni nomudou yau era kerea, oi kemudou yadua mai na wekana. Ia kaʼu a lesia nai vavakoso levu me vorati ira.
8Ia kaʼu a kaya vei ira, Me vaka na ka keitou sa rawata, keitou sa vakabulai ira na wekadra na Jiu, ko ira era sa volitaki eliu vei ira na veimatanitu kisau; ia dou na qai volitaki ira li na wekamudou; se ra na volitaki mai vei keda? Era sa qai galu, ka sega na ka me ra kaya.
9Au a kaya talega, Sa sega ni vinaka na ka kemudou sa cakava: e sega li ni dodonu mo dou rerevaka na noda Kalou e na nomudoui valavala, e na vuku ni nodra vosa ca na veimatanitu kisau, o ya na noda meca?
10Oi au talega, kei ira na wekaqu, kei ira na noqu tamata, e rawarawa me keitou kovea nai lavo kei na sila vei ira: tou muduka mada na veikove o qo.
11Dou vakasuka mada vei ira, io e na siga edaidai, na nodra vanua, na nodra veivainivaini, na nodra veiolive, kei na nodra veivale, kei na kenai kadrau ni wase ni lavo, kei na sila, na waini, kei na waiwai, dou sa kovea vei ira.
12Era sa qai kaya, Keitou na vakasuka, ka sega ni taroga vei ira e dua na ka; keitou na kitaka me vaka na nomu vosa. Au a qai kacivi ira na bete, ka kitaki ira me ra vosavavakini, me ra vakava me vaka na vosa ni yalayala o qo.
13Au a ceburaka talega na noqui sulu, ka kaya, Me ceburaka vakakina na Kalou na tamata kecega mai na nona vale, mai na nona cakacaka talega, o koya sa sega ni cakava nai yalayala o qo, ia me ceburaki vakakina ko koya, ka vakalalataki. A ra sa vakaemeni nai vavakoso taucoko, ka vakavinavinaka vei Jiova. A ra sa cakacaka na tamata me vaka na yalayala.
14Ia mai na gauna kaʼu a lesi kina me nodra turaga e na vanua ko Juta, mai nai karuasagavulu ni yabaki ka yacova nai katolusagavulu ka rua ni yabaki i Aritasasita na tui, a ya na yabaki e tinikarua, koi keitou kei ira na wekaqu, keitou sa sega ni kania na kakana ni turaga.
15Ia ko ira ka lesi me turaga eliu, era a dauvakaivoli vei ira na tamata, a sa taura maivei ira na kakana kei na waini, ka vasagavulu na sikeli siliva; io sa lewai ira na tamata ko ira na nodrai talatala, ia kaʼu a sega ni kitaka vakakina, e na vuku niʼu sa rerevaka na Kalou.
16Ta kaʼu a kitaka ga na cakacaka ni bai o qo, ka keitou a sega ni volia e dua na tiki ni vanua: a ra sa soqoni vata kecega na noqu tamata ki na cakacaka o qo.
17Ia sa dautiko ki na noqui kanakana e dua na drau ka limasagavulu vei ira na Jiu kei ira na turaga ni lewa, kei ira talega e so era sa lako mai vei keimami maivei ira na veimatanitu kisau, era tiko voleka vei keimami.
18Ia na ka sa cokonaki e na veisiga, sa dua na karavau, e ono na sipi digitaki; a sa cokonaki vei au na toa, ka vakabogitini e so mai na waini kecega: ia e na ka kecega o qo, kaʼu a sega ni taroga na kakana mai na turaga, e na vuku ni sa bibi na veivakabobulataki vei ira na tamata o qo.
19Mo nanumi au, noqu Kalou, meʼu vinaka kina, me vaka na ka kaʼu sa kitaka vei ira na tamata o qo.
Who We AreWhat We EelieveWhat We Do
2025 by iamachristian.org,Inc All rights reserved.
